Janasena: సీబీఐ మాజీ జేడీ లక్ష్మీనారాయణకు రాజకీయంలో చేదు అనుభవం

వీవీ లక్ష్మీనారాయణ.. ‘సీబీఐ జేడీ’ పదాన్ని తన ఇంటి పేరుగా మార్చుకున్న నిఖార్సైన పోలీస్ ఆఫీసర్. ఎంతో మంది యువకులకు స్ఫూర్తిప్రదాతగా నిలిచిన ఐపీఎస్. అలాంటి వ్యక్తి పోలీస్ బాస్ కొలువుకు రాజీనామా ఇచ్చి జనంతో మమేకమవడానికి ముందుకొచ్చారు. తన ఆలోచనలకు తగ్గట్టే జనసేన పార్టీలో చేరారు. విశాఖ లోక్‌సభ స్థానం నుంచి ఆ పార్టీ తరఫున ఎంపీ అభ్యర్థిగా బరిలో నిలిచారు. కానీ, ఐపీఎస్‌గా అవినీతిపరుల గుండెల్లో రైళ్లు పరుగెత్తించిన వీవీ లక్ష్మీనారాయణ.. ఓటర్ల మనసులను ఆకర్షించడంలో మాత్రం విఫలమయ్యారు. ఎంపీగా పార్లమెంట్‌లో అడుగుపెట్టి తనదైన వాక్చాతుర్యంతో ఆకట్టుకుంటారనుకుంటే.. ఘోరంగా నిరాశపరిచారు. రాజకీయ అరంగేట్రం చేసి చేదు అనుభవాన్ని మూటగట్టుకున్నారు.

విశాఖ పార్లమెంట్ స్థానం నుంచి పోటీ చేసిన వీవీ లక్ష్మీనారాయణ ఫ్యాన్ ప్రభంజనానికి ఎదురు నిలవలేకపోయారు. ఫలితాల్లో మూడో స్థానానికి పరిమితమయ్యారు. టీడీపీ, వైసీపీ హోరాహోరీ పోరులో చివరికి వైసీపీ ఎంపీ అభ్యర్థి ఎంవీవీ సత్యనారాయణనే విజయం వరించింది. ఈ స్థానం నుంచి టీడీపీ తరఫున గీతం విద్యాసంస్థల స్థాపకుడు, మాజీ ఎంపీ ఎంవీవీఎస్ మూర్తి మనవడు, బాలయ్య చిన్నల్లుడు శ్రీభరత్ పోటీ చేశారు. హోరాహోరీ పోరులో 3700 ఓట్ల తేడాతో శ్రీభరత్‌పై సత్యనారాయణ విజయం సాధించారు.

వీవీ లక్ష్మీనారాయణ స్వస్థలం వైఎస్సార్‌ కడప జిల్లా. కర్నూలు జిల్లా శ్రీశైలంలో విద్యాభ్యాసం చేసిన ఆయన ఐపీఎస్‌గా వివిధ రాష్ట్రాల్లో పనిచేశారు. విశాఖలో స్థానికేతర వ్యక్తిగా తన అదృష్టం పరీక్షించుకోవడానికి సాహసం చేశారు. ఈ స్థానం నుంచి బీజేపీ తరఫున పురందేశ్వరి పోటీ చేశారు. దీంతో ఇక్కడ పోటీ రసవత్తరంగా మారింది. మాజీ ఎంపీ పురందేశ్వరికి డిపాజిట్ కూడా గల్లంతవడం గమనార్హం.

గాలిని పీల్చినంత తేలిగ్గా గనులను గుటకాయ స్వాహా చేసిన ఘనాపాటి గాలి జనార్ధన్ రెడ్డి అవినీతి సామ్రాజ్యాన్ని బద్దలుకొట్టి, ఆయనను జైలుకు పంపించిన ఘనత సీబీఐ మాజీ జేడీ లక్ష్మీనారాయణది. వైఎస్సార్ కాంగ్రెస్ అధినేత వైఎస్ జగన్ కూడా ముప్పుతిప్పలు పెట్టి జైలుకు పంపిన మొండి ఘటం ఈయన. మచ్చలేని వ్యక్తిగా, పది మందికి సాయపడే గుణమున్న సేవకుడిగా, సమర్థ పోలీస్ అఫీసర్‌గా పేరొందిన లక్ష్మీనారాయణ.. రాజకీయ రణక్షేత్రంలో మాత్రం చేదు అనుభవాన్ని మూటగట్టుకోవడం శోచనీయం.