‘ఈవీఎంలపై నిందలొద్దు.. ఓటమిని హుందాగా అంగీకరించండి’

ఈవీఎంలపై విపక్షాలు అనుమానం వ్యక్తం చేస్తున్న నేపథ్యంలో కేంద్ర న్యాయ శాఖ మంత్రి రవిశంకర్ ప్రసాద్ ఘాటుగా స్పందించారు. ఓటమిని హుందాగా అంగీకరించాలని.. ఈవీఎంలపై నిందలు వేయడం ఇకనైనా మానుకోవాలని సూచించారు. ఈవీఎంల‌తో ఎలాంటి స‌మ‌స్య లేద‌ని స్పష్టం చేశారు. ఇవే ఈవీఎంలతో బెంగాల్‌లో మ‌మ‌తా బెన‌ర్జీ రెండుసార్లు సీఎం అయ్యారని గుర్తుచేశారు. మాయావతి, అఖిలేశ్, అరవింద్ కేజ్రీవాల్, చంద్రబాబు నాయుడు ఈవీఎంల ద్వారానే గెలిచి సీఎంలు అయ్యార‌ని చెప్పారు. కానీ, ఇప్పుడు బీజేపీ గెలవబోతుందని తెలిసి ఈవీఎంలపై నెపం నెట్టుతున్నారని మండిపడ్డారు.

‘ఇవే ఈవీఎంలతో వారు గెలిచినప్పుడు ఎలాంటి సమస్యా లేదు. కానీ, ఇప్పుడు బీజేపీ గెలవబోతుందని తెలియగానే ఈవీఎంలతో వారికి సమస్య వచ్చింది. ఇంతకంటే దారుణమైన, దిగజారుడు, హాస్యాస్పదమైన వ్యాఖ్యలు మరోటి ఉండవు. ఓటమి నుంచి తప్పించుకోవడానికే ఈవీఎంలపై నిందలు వేస్తున్నారు’ అని రవిశంకర్ ప్రసాద్ దుయ్యబట్టారు.

ఈవీఎంల ప‌ట్ల ప్రతిపక్షాలు వ్యవహరిస్తున్న తీరును తీవ్రంగా ఖండిస్తున్నామ‌ని ర‌విశంక‌ర్ ప్రసాద్ పేర్కొన్నారు. ఈవీఎంలపై నిందలు మాని.. ఓటమిని హుందాగా అంగీకరించాలని విపక్షాలకు ఆయన సూచించారు. మంగళవారం (మే 21) న్యూస్ ఏజెన్సీ ఏఎన్‌ఐ ప్రతినిధితో మాట్లాడుతూ ఆయన ఈ వ్యాఖ్యలు చేశారు..