నవంబర్లో సగం రోజులు చీకట్లో ఉండాల్సిందేనా?

ఒక రోజు సూర్యోదయం కాకపోతే? రోజంతా చిమ్మచీకట్లోనే కాలం గడపాల్సి వస్తే? అసలు ఊహకే అందని ప్రశ్నలు కదా ఇవి. అలాంటిది నవంబర్ నెలలో ఈ భూమి ఏకంగా 15 రోజులపాటు పూర్తిగా చీకట్లోనే ఉండిపోనుందనే వార్తలు వెలువడుతున్నాయి. ఈ వార్త అక్కడి నుంచి ఇక్కడి నుంచి కాదు ఏకంగా నాసా నుంచి వచ్చిందని చెబుతున్నారు. నవంబర్ 15 నుంచి 29 వరకు ఈ చీకటి రోజులు ఉంటాయని వార్తలొస్తున్నాయి. గురు, శుక్ర గ్రహాలు ఒకదానికొకటి దగ్గరగా రావడంతో ఇలా జరుగుతుందని, 10 లక్షల ఏళ్లకు ఒక్కసారి మాత్రమే ఇలా జరుతుందని అని వార్తలు వెలువడుతున్నాయి.

అయితే ఇదంతా కల్పితమేనని ఖగోళ పరిశోధకులు చెబుతున్నారు. నవంబర్ నెలలో చీకటి సంగతి అలా ఉంచితే ఆ నెల 16, 17 తేదీల్లో ఉల్కాపాతం జరగనుండటంతో ఆకాశంలో ఉల్కలు వెలుగులు విరజిమ్ముతాయని చెబుతున్నారు. ప్రతి 33 ఏళ్లకు ఒకసారి ఇలా జరుగుతుందని పరిశోధకులు చెబుతున్నారు. కాబట్టి 15 రోజులపాటు చీకట్లో ఉండిపోవాల్సి వస్తుందేమో అనే ఆందోళనలో ఉండిపోకుండా.. భూవాతావరణంలోకి మండుతూ దూసుకొచ్చే ఉల్కలను చూసి ఎంజాయ్ చేయండి.