డకౌటైన.. కోహ్లి మళ్లీ గొడవచేశాడు..!

ఐపీఎల్ పదో సీజన్‌లో భాగంగా కోల్‌కతా నైట్‌రైడర్స్‌తో ఆదివారం రాత్రి జరిగిన మ్యాచ్‌లో రాయల్ ఛాలెంజర్స్ బెంగళూరు కెప్టెన్ విరాట్ కోహ్లి రెండు సార్లు గొడవకి దిగాడు. తొలుత కోల్‌కతా కెప్టెన్ గౌతమ్ గంభీర్ ఔట్ నిర్ణయంపై ఫీల్డ్ అంపైర్లు తాత్సారం చేయడంతో ఆగ్రహంతో ఊగిపోయిన కోహ్లి మైదానంలోనే వారితో వాదనకి దిగాడు. అనంతరం లక్ష్య ఛేదనలో తను ఎదుర్కొన్న తొలి బంతికే ఔటవడంతో తీవ్ర అసహనంతో డగౌట్‌కి వెళ్లిపోయిన కోహ్లి మ్యాచ్ అధికారులను పిలిపించి స్టేడియంలోని సైట్ స్క్రీన్ నిర్వహణపై ఫిర్యాదు చేశాడు. ఈ మ్యాచ్‌లో తొలుత బ్యాటింగ్ చేసిన కోల్‌కతా 19.3 ఓవర్లలో 131 పరుగులకు ఆలౌటవగా.. ఛేదనకు దిగిన బెంగళూరు అనూహ్యంగా 9.4 ఓవర్లలోనే 49 పరుగులకు కుప్పకూలి ఘోర పరాజయాన్ని మూటగట్టుకుంది.

మ్యాచ్ ఆరంభంలోనే మిల్స్ విసిరిన బంతిని ప్లిక్ చేయబోయిన గంభీర్ కీపర్ కేదార్ జాదవ్ చేతికి చిక్కాడు. అయితే బంతి బ్యాట్‌కి తాకలేదని భావించిన ఫీల్డ్ అంపైర్ అనుమానం వ్యక్తం చేస్తూనే తుది నిర్ణయం కోసం థర్డ్ అంపైర్‌కి నివేదించాడు. దీంతో కోహ్లి ఒక్కసారిగా అంపైర్ నందన్ వద్దకు వెళ్లి అంత క్లియర్‌గా ఔట్ అని తెలుస్తున్నా ఎందుకు.. ఇవ్వలేదంటూ వాదనకి దిగాడు. రిప్లైలో బంతి బ్యాట్‌ని తాకకపోయినా.. గంభీర్ గ్లౌవ్స్‌ని తాకుతూ వెళ్లడంతో చివరికి థర్డ్ అంపైర్ ఔట్‌గా ప్రకటించాడు. అనంతరం ఛేదనలో కోల్‌కతా బౌలర్ కౌల్టర్ నైల్ ఆఫ్ స్టంప్‌కి దూరంగా విసిరిన బంతిని వెంటాడిన కోహ్లి స్లిప్‌లో మనీశ్ పాండే చేతికి చిక్కి డకౌటయ్యాడు. అనంతరం డగౌట్‌కి వెళ్లి సమీపంలో ఉన్న మ్యాచ్ అఫిషియల్స్‌ని అక్కడికి పిలిపించాడు. స్టేడియంలో సైట్ స్క్రీన్ చాలా చిన్నదిగా ఉందని.. అక్కడ ఎవరో ఒక వ్యక్తి కొద్ది సేపటి నుంచి తచ్చాడుతున్నాడంటూ ఫిర్యాదు చేశాడు. బౌలర్ వెనకవైపు అలా ఒక వ్యక్తి కదలిక తన ఏకాగ్రత దెబ్బతీసిందని కోహ్లి వాపోయాడు. ఈ విషయమై హెచ్చరించినా పట్టించుకోలేదంటూ అసహనం ప్రదర్శించాడు. మ్యాచ్ ముగిసే వరకూ కోపంతోనే కోహ్లి డగౌట్‌లో కనిపించాడు.