మునివేళ్లపై నిలబెట్టిన ‘సూపర్ ఓవర్’ వీడియో

ఐపీఎల్ పదో సీజన్‌లో తొలిసారి ఓ సూపర్ ఓవర్ ద్వారా మ్యాచ్ ఫలితం తేలింది. రాజ్‌కోట్ వేదికగా గుజరాత్ లయన్స్, ముంబయి ఇండియన్స్ మధ్య శనివారం రాత్రి జరిగిన మ్యాచ్‌లో స్కోర్లు సమమవడంతో అంపైర్లు సూపర్ ఓవర్ నిర్వహించారు. ఇప్పటికే ఉత్కంఠ మ్యాచ్‌లతో ఊగిపోతున్న అభిమానుల్ని ఈ మ్యాచ్ మునివేళ్లపై నిలబడి చూసేలా చేసిందంటే అతిశయోక్తి కాదేమో. చివరికి ఈ సూపర్ ఓవర్‌లో సైతం ఆఖరి బంతి వరకూ ఎవరు గెలుస్తారో అంచనా వేయలేని విధంగా సాగింది పోరు. అయితే ఒత్తిడిని జయించిన బుమ్రా అద్భుతమైన బౌలింగ్‌తో ముంబయిని విజేతగా నిలిపాడు.

సూపర్ ఓవర్ నిబంధనల ప్రకారం రెండోసారి బ్యాటింగ్ చేసిన జట్టు మొదట బ్యాటింగ్ చేస్తుంది. దీంతో ముంబయి జట్టు హిట్టర్లు పొలార్డ్, బట్లర్‌లను రంగంలోకి దింపింది. మరోవైపు గుజరాత్ లయన్స్ ఆండ్రూ టై గాయపడటంతో అప్పటికే మెరుగైన ప్రదర్శనతో మెప్పించిన బౌలర్ ఫాల్కనర్‌ చేతికి బంతి ఇచ్చింది. తొలి బంతికి బట్లర్ సింగిల్ తీయగా.. ఆఫ్ స్టంప్‌కి దూరంగా పడిన రెండో బంతిని పొలార్డ్ ఫోర్‌గా మలిచాడు. దీంతో ఒత్తిడికి గురైన ఫాల్కనర్ మరోసారి అలాంటి బంతినే విసరగా.. ఈ సారి పొలార్డ్ ఏకంగా సిక్స్ బాదేయడంతో ముంబయి మెరుగైన స్కోరు చేసేలా కనిపించింది. కానీ.. నాలుగో బంతికి బౌండరీ లైన్ వద్ద పొలార్డ్ ఔటవగా.. ఐదో బంతికి భారీ షాట్ కోసం ప్రయత్నించిన బట్లర్ కూడా ఫీల్డర్ ఇషాన్ కిషన్ చిక్కడంతో ముంబయి 11 పరుగులకే ఆలౌటైంది. సూపర్ ఓవర్‌లో రెండు వికెట్లు పడితే ఆలౌటైనట్లే.


12 పరుగుల లక్ష్యఛేదన కోసం గుజరాత్ జట్టు మేటి హిట్టర్లు మెక్‌కలమ్, అరోన్ ఫించ్‌లను పంపింది. డెత్ ఓవర్ల స్పెషలిస్ట్ జస్‌ప్రీత్ బుమ్రాకి ముంబయి బంతి అప్పగించింది. అప్పటికే మ్యాచ్‌లో వరుసగా రెండు నో బాల్స్ వేసిన బుమ్రా సూపర్ ఓవర్‌లో కూడా తొలి బంతినే నో బాల్‌గా విసిరాడు. దీంతో ఒక పరుగుతో పాటు గుజరాత్‌కి ఫ్రీ హిట్ వచ్చినా.. ఫించ్ వినియోగించుకోలేకపోయాడు. తర్వాత బంతికి స్విచ్‌ షాట్ కోసం ప్రయత్నించి విఫలమవడంతో ఒక పరుగు మాత్రమే వచ్చింది. రెండో బంతిని బుమ్రా విసరకముందే.. మెక్‌కలమ్ స్వీప్ కోసం ప్రయత్నిస్తున్నట్లు బ్యాట్ పట్టడంతో ఆఫ్ స్టంప్‌కి దూరంగా వైడ్‌గా విసిరేశాడు. కానీ.. తర్వాత ఒత్తిడి తగ్గించుకున్న బుమ్రా కట్టుదిట్టమైన యార్కర్లతో చెలరేగిపోయాడు. అతి కష్టం మీద రెండు బంతుల్ని మాత్రమే బ్యాట్‌తో తాకించిన ఈ హిట్టర్లు ఓవర్‌లో చివరికి 6 పరుగులు మాత్రమే రాబట్టగలిగారు. గుజరాత్ స్కోరు.. నోబాల్ (1), లెగ్‌బై (1), వైడ్ (1), బై (1), ఫించ్ (1 పరుగు), మెక్‌కలమ్ (1 పరుగు). ఇద్దరూ కనీసం ఒక బౌండరీ కూడా కొట్టలేకపోవడంతో గుజరాత్‌కి ఓటమి తప్పలేదు.