మలింగ అలా వేస్తాడని ముందే తెలుసా..?

ఐపీఎల్ పదో సీజన్‌ ఉత్కంఠ ఫైనల్‌తో ఆదివారం రాత్రి ముగిసింది. రైజింగ్ పుణె‌ సూపర్ జెయింట్‌పై ఒక పరుగు తేడాతో ముంబయి ఇండియన్స్ గెలుపొంది మూడో సారి టైటిల్‌ని చేజిక్కించుకుంది. 130 పరుగుల స్వల్ప లక్ష్య ఛేదనలో పుణె ఒకానొక దశలో 71/1తో నిలిచి అలవోకగా విజయం సాధించేలా కనిపించింది. కానీ.. చివర్లో ఒత్తిడికి తలొగ్గిన ఆ జట్టు వరుసగా వికెట్లు చేజార్చుకుని ఓటమిపాలైంది. చివరి మూడు ఓవర్లలో పుణె విజయానికి 30 పరుగులు అవసరం కాగా.. యార్కర్ల మలింగకి రోహిత్ శర్మ బంతినిచ్చాడు. అప్పటికే క్రీజులో కుదురుకున్న స్టీవ్‌స్మిత్ తికమక పుట్‌వర్క్‌తో మలింగ లయని దెబ్బతీసేందుకు తీవ్రంగా ప్రయత్నించినా.. ఫలితం లేకపోయింది. ఆ ఓవర్‌లో వరుసగా స్మిత్ కాళ్ల వద్ద యార్కర్లు విసిరిన మలింగ కేవలం 7 పరుగులే ఇవ్వడంతో సమీకరణం 12 బంతుల్లో 23 పరుగులుగా మారిపోయింది.

‘గత కొన్నేళ్లుగా ముంబయి జట్టులో మలింగ అద్భుత ప్రదర్శన చేస్తున్నాడు. పుణె‌తో ఫైనల్లో కూడా అతను తప్పకుండా మాయ చేస్తాడని నేను విశ్వసించాను. తాజా సీజన్‌లో జట్టు అంచనాలని ఫైనల్ వరకూ మలింగ అందుకోలేకపోయినా.. ఒక ఓవర్‌లోనే మ్యాచ్‌ని మలుపు తిప్పగల సత్తా అతనికి ఉంది. ఒత్తిడిలో కూడా ఫీల్డర్లు గొప్పగా ఫీల్డింగ్ చేశారు’ అని ముంబయి ఇండియన్స్ మెంటార్ సచిన్ తెందుల్కర్ ప్రశంసించాడు. మ్యాచ్ తొలి అర్ధభాగంలో ముంబయి ఇండియన్స్‌కి గట్టి ఎదురుదెబ్బలు తగిలినా మళ్లీ పుంజుకుందని.. ప్రధాన కోచ్ మహేల జయవర్దనె సందేశంతో జట్టులో స్ఫూర్తి నింపారని సచిన్ కొనియాడాడు.