రెండు ఓవర్లే చూస్తా.. తర్వాత ఉతికేస్తా..!

పిచ్‌పై బంతి స్పందించే తీరును నిశితంగా పరిశీలించిన అనంతరమే హిట్టింగ్ చేస్తానని రైజింగ్ పుణె సూపర్ జెయింట్ ఓపెనర్ రాహుల్ త్రిపాఠి వెల్లడించాడు. సన్‌రైజర్స్ హైదరాబాద్‌తో పుణె వేదికగా జరిగిన మ్యాచ్‌లో త్రిపాఠి (59; 41 బంతుల్లో 6×4, 3×6) మెరుపు అర్ధశతకంతో రైజింగ్ పుణె జట్టుకి 177 పరుగుల ఛేదనలో మెరుపు ఆరంభమిచ్చిన విషయం తెలిసిందే. ఓపెనర్ రహానె (2) ఆదిలోనే పెవిలియన్ చేరినా.. ఏమాత్రం బెదరకుండా భారీ షాట్లు ఆడిన త్రిపాఠి వరుస బౌండరీలు బాదేశాడు. ఒకానొక దశలో కెప్టెన్ స్టీవ్‌స్మిత్ సైతం స్ట్రైక్ రొటేట్ చేస్తూ ఈ ఓపెనర్‌‌కే ఎక్కువ బంతుల్ని ఆడే అవకాశం కల్పించాడు. రెగ్యులర్ ఓపెనర్ మయాంక్ అగర్వాల్ విఫలమవడంతో గత మూడు మ్యాచ్‌లు నుంచి త్రిపాఠికి పుణె అవకాశం కల్పించింది. అయితే బెంగళూరు, గుజరాత్ జట్లపై విఫలమైన ఈ యువ హిట్టర్ హైదరాబాద్‌పై అర్ధశతకం బాది జట్టులో గట్టి పునాది వేసుకున్నాడు. చివర్లో ధోనీ (61 నాటౌట్) చెలరేగడంతో ఈ మ్యాచ్‌లో 6 వికెట్ల తేడాతో పుణె జట్టు విజయం సాధించిన విషయం తెలిసిందే.


‘తొలుత ఒకటి లేదా రెండు ఓవర్లు బంతి స్పందిచే తీరును పరిశీలిస్తా. అనంతరం జట్టు అవసరాలకు అనుగుణంగా భారీ షాట్లు ఆడేందుకు ప్రయత్నిస్తాను. మొదటి ఆరు ఓవర్లలో జట్టుకి మెరుగైన ఆరంభం అవసరం. గత రెండు మ్యాచ్‌ల్లోనూ ఈ ఆరంభం ఇచ్చేందుకే రహానెతో కలిసి ప్రయత్నించా. గతి తప్పిన బంతుల్ని మాత్రం భారీ షాట్లతో నిర్ధాక్షిణంగా బౌండరీకి తరలించేస్తాను. ధోని మ్యాచ్‌లను ఫినిష్ చేసే విధానాన్నిగతంలో టీవీలో చూశాను. కానీ.. ప్రత్యక్షంగా మరో ఎండ్ నుంచి చూసి ఆశ్చర్యపోయాను. అంత ఒత్తిడిని తట్టుకుని మ్యాచ్‌ని ముగించడం ఎలా అనేది నిజంగా అతడి నుంచే నేర్చుకోవాలి’ అని త్రిపాఠి వివరించాడు.