ఐఫోన్ 8 ధరెంతో తెలిసిపోయింది!

ఆపిల్ తన పాపులర్ ఐఫోన్‌లో కొత్త మోడల్‌ను తీసుకొస్తుందంటే అందరి కళ్లు దానిపైనే ఉంటాయి. కొత్త ఐఫోన్‌లో ఏమేమి ఫీచర్లుంటాయి, ధరెంతుంటుంది లాంటి విషయాలు తెలుసుకోడానికి అమితాసక్తి చూపుతుంటారు. అలాంటి వారికోసం ప్రముఖ ఎలక్ట్రానిక్ గాడ్జెట్స్ విశ్లేషకుడు మింగ్-చు కువో రాబోయే ఐఫోన్ల గురించి కొన్ని విషయాలు వెల్లడిస్తూ ఉంటారు. యాపిల్ ఉత్పత్తులపై ఈయన ఇచ్చే సమాచారాన్ని చాలా విశ్వసనీయంగా ఉంటుందని పరిశ్రమ వర్గాలు చెపుతుంటాయి.

ఆపిల్ పదో వార్షికోత్సవం సందర్భంగా వచ్చే ఏడాది ఐఫోన్ 8 మోడల్స్ మార్కెట్‌లో సందడి చేయనున్నాయి. ఈ నేపథ్యంలో మింగ్-చు కువో ఐఫోన్ 8కి సంబంధించిన కొంత సమాచారాన్ని బయటపెట్టారు. ఐఫోన్ 8 ధర, మోడల్‌ ఎలా ఉండబోతోందో అంచనా వేశారు. ఈయన అంచనా ప్రకారం ఐఫోన్ 8 ధరలు 1000 డాలర్ల (సుమారు రూ. 70వేలు) నుంచి ప్రారంభమవుతాయి. తయారీ ఖర్చు 50 నుంచి 60 శాతం పెరగడం వల్ల ఐఫోన్ 8 ప్రారంభ ధర కూడా పెరిగుతుందని ఆయన అంచనా వేశారు.

వాణిజ్య విశ్లేషణ సంస్థ ‘ఫాస్ట్ కంపెనీ’ కూడా నెలక్రితం ఇదే మాట చెప్పింది. రాబోయే ఐఫోన్ ఓఎల్‌ఈడీ డిస్ల్పేని కలిగి ఉండటం వల్ల ధరలు 1000 డాలర్ల పైనే ఉంటాయని తెలిపింది. ఇక డిజైన్ విషయానికొస్తే.. ఇప్పటి వరకు ఐఫోన్ హోం బటన్‌కు అమర్చిన టచ్ ఐడీ (ఫింగర్‌ప్రింట్ సెన్సార్)ని ఆపిల్ తొలగిస్తుందని కువో అంచనా వేశారు. దీనికి బదులు ‘ఫంక్షన్’ పేరుతో మరో ఫింగర్ ప్రింట్ సెన్సార్‌ను వాడనున్నట్లు ఆయన చెప్పారు. 5.8 అంగుళాల ఓఎల్‌ఈడీ పానెల్‌తో వస్తోన్న ఐఫోన్ 8లో డిస్ప్లే ఏరియా 5.15 అంగుళాలు ఉంటుందని తెలిపారు.

మొత్తం మీద ఆపిల్ ఐఫోన్‌లకు ఎప్పటి నుంచో ఉపయోగిస్తున్న టచ్ ఐడీ ఇకపై కనుమరుగు కానుంది. ఐఫోన్ 8లో సరికొత్త సెక్యూరిటీ ఫీచర్లను ఆపిల్ పొందుపరచనుంది. 3డీ లేజర్ స్కానింగ్ ద్వారా యూజర్ ముఖాన్ని గుర్తించే టెక్నాలజీ ఐఫోన్ 8లో రానుందట.