టాస్ గెలిచి ఫీల్డింగ్ ఎంచుకున్న కోల్‌కతా

కోల్‌కతా: ఐపీఎల్‌లో మరో కీలక పోరు మొదలైంది. కోల్‌కతా నైట్ రైడర్స్, పంజాబ్ కింగ్స్ ఎలెవన్ జట్ల మధ్య జరుగుతున్న మ్యాచ్‌లో టాస్ గెలిచిన కోల్‌కతా జట్టు ముందుగా ఫీల్డింగ్ ఎంచుకుంది. ఛేజింగ్‌లో విజయానికి ఎక్కువ అవకాశాలు ఉండటంతో ఆ జట్టు లక్ష్య చేధనకే మొగ్గు చూపింది. పంజాబ్ జట్టు ఆడిన రెండు మ్యాచ్‌ల్లో విజయం సాధించి ఊపు మీద ఉండగా.. ముంబై ఇండియన్స్‌తో జరిగిన చివరి మ్యాచ్‌లో గంభీర్ సేన పోరాడి ఓడింది.

అద్భుత ఫామ్‌లో ఉన్న కోల్‌‌కతా ఓపెనర్ లిన్... గాయం కారణంగా ఈ మ్యాచ్‌కు దూరంగా కాగా అతడి స్థానంలో గ్రాండ్‌హోమ్‌ను తుది జట్టులోకి తీసుకున్నారు. కుల్దీప్, అంకిత్ రాజ్‌పుత్‌ ఈ మ్యాచ్‌లో ఆడటం లేదు వారి స్థానంలో పియుష్ చావ్లా, ఉమేశ్ యాదవ్‌లు బరిలో దిగుతున్నారు.

కింగ్స్ ఎలెవన్ పంజాబ్ జట్టు ఒక్క మార్పుతో బరిలో దిగుతోంది. నటరాజన్ స్థానంలో ఇషాంత్ శర్మను తుది జట్టులోకి తీసుకుంది.

కోల్‌కతా జట్టు: గంభీర్ (కెప్టెన్), ఉతప్ప (కీపర్), మనీష్ పాండే, యూసుఫ్ పఠాన్, సూర్య కుమార్ యాదవ్, గ్రాండ్‌హోమ్, వోక్స్, సునీల్ నరైన్, పియుష్ చావ్లా, బౌల్ట్, ఉమేశ్ యాదవ్.

పంజాబ్ జట్టు: హషీమ్ ఆమ్లా, వోహ్రా, గ్లేన్ మ్యాక్స్‌వెల్, డేవిడ్ మిల్లర్, అక్షర్ పటేల్, సాహా, స్టోయినిస్, మోహిత్ శర్మ, ఇశాంత్ శర్మ, సందీప్ శర్మ, వరుణ్ అరోన్.