బెంగళూరు వర్సెస్ ముంబై: టాస్ నెగ్గిన రోహిత్

బెంగళూరు: రాయల్ ఛాలెంజర్స్, ముంబై ఇండియన్స్ జట్ల మధ్య జరుగుతున్న మ్యాచ్‌లో టాస్ గెలిచిన ముంబై జట్టు ఫీల్డింగ్ ఎంచుకుంది. ముంబై కెప్టెన్ రోహిత్ శర్మ మరోసారి ఛేజింగ్‌కే మొగ్గు చూపాడు. చిన్నస్వామి స్టేడియంలో ముంబై జట్టు టాస్ నెగ్గడం ఇదే తొలిసారి కావడం విశేషం. ఈ మ్యాచ్‌లో రాయల్ ఛాలెంజర్స్ తరఫున విరాట్ కోహ్లి బరిలో దిగుతున్నాడు. గత మ్యాచ్‌లో పక్కన బెట్టిన క్రిస్ గేల్‌కు కూడా ఈ మ్యాచ్‌లో జట్టులో చోటు దక్కింది. గత మూడు మ్యాచ్‌ల్లో బెంగళూరుకు కెప్టెన్‌గా వ్యవహరించిన షేన్ వాట్సన్ ఈ మ్యాచ్‌కు దూరమయ్యాడు.

కోల్‌కతా నైట్ రైడర్స్, సన్‌రైజర్స్ హైదరాబాద్ జట్లపై వరుస విజయాలతో ఊపు మీదున్న ముంబై జట్టు ఒక మార్పుతో బరిలో దిగుతోంది. మలింగ ఫిట్‌గా లేకపోవడంతో అతడి స్థానంలో సౌథీ తుది జట్టులో స్థానం సంపాదించాడు. భుజం నొప్పి నుంచి కోలుకున్న కోహ్లి ఈ సీజన్లో తొలి మ్యాచ్ ఆడుతుండటంతో విజయంపై బెంగళూరు జట్టు ధీమాగా ఉంది.