ఎవరిపై కోపం గంభీర్.. ఇలా కొడుతున్నావు..?

ఐపీఎల్ పదో సీజన్‌కి ముందు విరాట్ కోహ్లి, మహేంద్రసింగ్ ధోనీ, యువరాజ్ సింగ్‌‌‌లు తమ ఆటతో టోర్నీని దున్నేస్తారని అంతా భావించారు. కానీ.. అభిమానుల అంచనాలు తలకిందులయ్యాయి. సీజన్‌లో ఇప్పటికే సగం మ్యాచ్‌లు ముగిసినా ఈ స్టార్ క్రికెటర్లు మెరిసింది తక్కువే. అయితే అనూహ్యంగా భారత వెటరన్ ఓపెనర్ గౌతమ్ గంభీర్ సూపర్ ఫామ్‌ని కొనసాగిస్తూ టాప్‌గేర్‌లో దూసుకెళ్తున్నాడు. కోల్‌కతా నైట్‌రైడర్స్‌కి తన క్లాస్ బ్యాటింగ్‌తో అద్భుత విజయాలు అందిస్తూ ఏకంగా పాయింట్ల పట్టికలో జట్టును అగ్రస్థానంలో నిలిపాడు.

టోర్నీలో 9 మ్యాచ్‌లాడిన గంభీర్ 4 అర్ధశతకాలు బాది మొత్తం 376 పరుగులతో టాప్ స్కోరర్‌గా అరెంజ్ క్యాప్ అందుకున్నాడు. ఈ ఇన్నింగ్స్‌ల్లో ఉన్న 49 ఫోర్లే అతని బ్యాటింగ్ నైపుణ్యాన్ని స్పష్టం చేస్తున్నాయి. గాల్లోకి బంతిని ఎక్కువగా లేపకుండా ఫీల్డర్ల మధ్యలోంచి బంతిని ఈ ఓపెనర్ చాకచక్యంగా తరలించే విధానం యువ క్రికెటర్లకి ఓ పాఠమనే చెప్పాలి. తాజాగా ఢిల్లీ డేర్‌డెవిల్స్‌తో ఈడెన్‌ గార్డెన్స్ వేదికగా జరిగిన మ్యాచ్‌లో అర్ధశతకం బాదిన గంభీర్ టీ20 ఫార్మాట్‌లో ఆరువేల పరుగుల మైలురాయిని అందుకున్నాడు. దీంతో పాటు కేవలం ఐపీఎల్‌లోనే 4000 పరుగులను పూర్తి చేసుకుని.. టోర్నీలో అత్యధిక అర్ధశతకాలు (35) బాదిన ఏకైక క్రికెటర్‌గా నిలిచాడు. గంభీర్ తర్వాత స్థానంలో హైదరాబాద్ కెప్టెన్ డేవిడ్ వార్నర్ (34) ఉన్నాడు.

భారత్ జట్టులోకి పునరాగమనం కోసం ఆత్రుతగా ఎదురుచూస్తున్న ఈ ఓపెనర్‌పై సెలక్టర్లు శీతకన్ను వేస్తున్నారు. దీంతో గత కొంతకాలంగా గుర్రుగా ఉంటున్న గంభీర్ తన ఆటతోనే వారికి బుద్ధి చెప్పాలని పట్టుదలతో బ్యాటింగ్ చేస్తున్నాడు. గత ఏడాది ఇంగ్లాండ్‌పై రెండు టెస్టుల్లో అవకాశం ఇచ్చిన్నట్లే ఇచ్చి.. మళ్లీ మొండిచేయి చూపారు. ఈ నిర్ణయంపై తెరవెనుక కారణాలు చాలానే ఉన్నాయి. కానీ.. పట్టువదలని తత్వమున్న 35 ఏళ్ల గంభీర్.. టీమిండియాకి ఆడుతూనే ఆటకు వీడ్కోలు చెప్పాలని భీష్మించుకుని క్రికెట్ ఆడుతున్నాడు.