శుక్ర గ్రహ అధ్యయన ప్రాజెక్ట్‌లో కీలక ముందడుగు!

శుక్రుడి అధ్యయనానికి త్వరలో ఉపగ్రహాన్ని పంపనున్న ఇస్రో అంతరిక్ష ప్రయోగాల కోసం దేశంలోని శాస్త్రవేత్తల నుంచి ప్రతిపాదనలను ఆహ్వానిస్తోంది. శుక్రుడి అధ్యయానికి వెళ్లే ఉపగ్రహం 175 కిలోల బరువు కలిగి 500 వాట్ల సామర్థ్యంతో పనిచేస్తుంది. ఇది శుక్రుడి కక్ష్యలో 500 X 60,000 కిలోమీటర్ల పరిధిలో పరిభ్రమించి కొన్ని నెలల తర్వాత నెమ్మదిగా వేగం తగ్గిపోతుందని ఇస్రో తెలిపింది. దీని ద్వారా ఆ గ్రహ వాతావరణం, ఉపరితల అధ్యయనం, సూర్యుడితో గల పరస్పర సంబంధం, జీవరాశి ప్రయోగాలు, సాంకేతి ప్రదర్శనపై ప్రధానంగా దృష్టి సారిస్తుంది.

ఈ మిషన్‌కి ఇప్పటికే అమోదం లభించిందని, ప్రయోగ తేది నిర్ణయించాల్సి ఉందని ఇస్రో అధికారలు వెల్లడించారు. భారత అంతరిక్ష పరిశోధనల డిమాండ్‌ను దృష్టిలో ఉంచుకుని శుక్రుని అధ్యయనానికి అమోదం లభించినట్లు అధికారులు తెలిపారు. ఈ ప్రయోగ ప్రాముఖ్యతను ఇస్రో వివరిస్తూ శుక్రుడుని భూమికి సోదరిగా పేర్కొంటారని అంది. ఎందుకంటే ఆకారం, పరిమాణం, సాంద్రత, గురుత్వాకర్షణలో ఈ రెండు గ్రహాలకు దగ్గర పోలికలు ఉన్నట్లు తెలిపింది. అలాగే ఈ రెండూ 4.5 బిలియన్ సంవత్సరాల కిందటే ఏర్పడినట్లు నమ్ముతున్నారు.

శుక్ర గ్రహ అధ్యయనం 1960లో ప్రారంభమైందని భారత అంతరిక్ష సంస్థ తెలిపింది. ఈ గ్రహ అన్వేషణలో పురోగతి సాధించినప్పటికీ, ఉపరితలం, ఉప ఉపరితల లక్షణాలు, ప్రక్రియలు, దాని వాతావరణ పరిస్థితులు, భ్రమణం, పరిణామం, సౌర వికిరణ, గాలితో పరస్పర చర్యల గురించిన ఇప్పటికీ సరైన అవగాహన లేదని ఇస్రో పేర్కొంది.