ప్రపంచాన్ని ఔరా అనిపించనున్న ఇస్రో!

సైన్స్ అండ్ టెక్నాలజీలో భారత్ మరో ముందడుగు వేయనుంది. ప్రపంచం మంతా నోరు వెళ్లబెట్టే స్థాయిలో... సరికొత్త ప్రయోగానికి నాంది పలుకుతోంది. ఒకేసారి 103 శాటిలైట్లు (ఉపగ్రహాలు)ను అంతరిక్షంలోకి ప్రవేశపెట్టి అరుదైన రికార్డును సొంతం చేసుకోనుంది. ఫిబ్రవరి మొదటి వారంలో జరిగే ఈ ప్రయోగానికి ఇస్రో అన్నివిధాలా సిద్ధమవుతోంది. వీటిలో అమెరికా, జర్మనీ దేశాలకు చెందిన ఉపగ్రహాలు కూడా ఉన్నాయి. ఈ సందర్భంగా ఇస్రోలోని లిక్విక్ ప్రోప్యులసిన్ సిస్టమ్స్ సెంటర్ డైరెక్టర్ సోమ్‌నాథ్ మాట్లాడుతూ.. ఒకేసారి వంద శాటిలైట్ల ప్రయోగంతో తాము సెంచురీ చేస్తున్నామన్నారు. తొలుత 83 శాటిలైట్లను జనవరి నెలలోనే ప్రయోగించాలని భావించారని, వాటి సంఖ్య తాజాగా మరో 20కు పెరగడంతో ఫిబ్రవరి మొదటి వారానికి వాయిదా పడిందన్నారు.

పోలార్ శాటిలైట్ లాంచ్ వెహికిల్ (PSLV)-C37... ద్వారా 100 మైక్రో స్మాల్ శాటిలైట్లును పంపిస్తామన్నారు. లాంచ్ వెహికిల్ బరువు సుమారు 1350 కిలోలు ఉంటుందని, శాటిలైట్ల బరువు 500 నుంచి 600 కిలోలు ఉంటుందని తెలిపారు. అంతరిక్ష చరిత్రలో ఇది ఒక రికార్డుగా మిగిలిపోతుందన్నారు.