Amazon layoffs : సుమారు 10,000 ఉద్యోగుల్ని తీసేయనున్న అమెజాన్‌..!

Amazon Plans to lay off 10000 employees: ఫేస్‌బుక్, ట్విట్టర్ బాటలోనే ప్రపంచ టెక్నాలజీ దిగ్గజమైన అమెజాన్ కూడా నడవబోతున్నట్లు అర్థమవుతోంది. రాబోయే రోజుల్లో అమెజాన్ భారీ సంఖ్యలో ఉద్యోగులను తొలగించుకోవడం ద్వారా ఆర్థిక భారాన్ని తగ్గించుకునే ప్రయత్నాలు మొదలుపెట్టింది. దాదాపు 10 వేల మంది ఉద్యోగులను తొలగించేందుకు అమెజాన్ రంగం సిద్ధం చేసుకుంటోంది. రాబోయే వారం రోజుల్లోనే ఆ ప్రక్రియ కూడా ప్రారంభమయ్యే అవకాశాలు ఉన్నాయని మీడియాలో ప్రపంచ దిగ్గజమైన 'ది న్యూయార్క్ టైమ్స్' వెల్లడించింది. ఈ సంఖ్య అమెజాన్ కార్పొరేట్ ఉద్యోగుల్లో 3 శాతం కానుండగా.. ప్రపంచవ్యాప్తంగా ఉన్న సిబ్బందిలో 1 శాతం కంటే తక్కువగానే ఉండనుందని ది న్యూయార్క్ టైమ్స్ కథనం పేర్కొంది.

ఉద్యోగులను తొలగించే విభాగాల్లో ప్రధానంగా.. అమెజాన్ డివైజెస్ ఆర్గనైజేషన్, వాయిస్ అసిస్టెంట్ అలెక్సా, రిటేల్ విభాగం, మానవ వనరుల విభాగాల్లో ఉద్యోగాల కోత ఉండే అవకాశాలు ఉన్నాయి. ట్విటర్ సీఈఓ ఎలాన్ మస్క్, మెటా సీఈఓ మార్క్ జుకర్ బర్గ్ జాబ్ కట్స్‌పై సంచలన నిర్ణయం తీసుకున్న కొద్ది రోజులకే అమెజాన్ కూడా అదే బాటలో నడుస్తుండటం కార్పొరేట్ ప్రపంచాన్ని, ఐటీ ఉద్యోగులను ఆందోళనకు గురిచేస్తోంది.

గత ఏడాది డిసెంబర్ 31 నాటికి.. అమెజాన్‌లో దాదాపు 1,60,8000 మంది ఫుల్‌టైమ్, పార్ట్‌టైమ్ ఉద్యోగులు ఉన్నారు. అయితే ఆర్థిక మాంద్యం వస్తుందనే భయాల నేపథ్యంలో కంపెనీలు తమ ఖర్చులు తగ్గించుకునేందుకు ఉద్యోగులపై వేటు వేస్తున్నాయి. గత వారం.. ఫేస్‌బుక్ మాతృ సంస్థ మెటా ఖర్చులను నియంత్రించడానికి 11,000 కంటే ఎక్కువ ఉద్యోగాలను లేదా 13% ఉద్యోగులను తగ్గించనున్నట్లు ప్రకటించిన విషయం తెలిసిందే.