ఆమ్లా ‘క్లాస్’ శతకం.. గుజరాత్ టార్గెట్ 190

ఐపీఎల్ పదో సీజన్‌లో కింగ్స్ ఎలెవన్ పంజాబ్ ఓపెనర్ హసీమ్ ఆమ్లా మరోసారి తన క్లాస్ ఇన్నింగ్స్‌తో ఆకట్టుకున్నాడు. మొహాలి వేదికగా గుజరాత్ లయన్స్‌తో జరుగుతున్న మ్యాచ్‌లో ఆమ్లా (104: 60 బంతుల్లో 8x4, 5x6) మెరుపు శతకం బాదడంతో తొలుత బ్యాటింగ్ చేసిన పంజాబ్ 20 ఓవర్లలో 3 వికెట్ల నష్టానికి 189 పరుగులు చేసింది. ఓపెనర్ మార్టిన్ గప్తిల్ (2) తొలి ఓవర్‌లోనే పెవిలియన్ చేరినా.. షాన్ మార్ష్ (58: 43 బంతుల్లో 6x4)తో కలిసి ఆమ్లా జట్టుకు భారీ స్కోరు అందించాడు. గుజరాత్ బౌలర్లపై ఎదురుదాడికి దిగిన ఈ జోడి రెండో వికెట్‌కి 14.5 ఓవర్లలో 125 పరుగుల భాగస్వామ్యం నెలకొల్పింది. ఈ క్రమంలోనే ఆమ్లా 35 బంతుల్లో అర్ధశతకం పూర్తి చేసుకోగా.. కొద్దిసేపటికే మార్ష్ కూడా 37 బంతుల్లో 50 పరుగుల మైలురాయిని అందుకున్నాడు. ప్రమాదకరంగా మారిన ఈ జోడిని జట్టు స్కోరు 127 పరుగుల వద్ద మార్ష్‌ను ఔట్ చేయడం ద్వారా కులకర్ణి విడదీశాడు.

మార్ష్ అనంతరం క్రీజులోకి వచ్చిన మాక్స్‌వెల్‌ (20 నాటౌట్: 11 బంతుల్లో 2x6)తో కలిసి జోరు పెంచిన ఆమ్లా ఎడాపెడా బౌండరీలు బాదేశాడు. పేస్ బౌలింగ్‌లో అనూహ్యంగా స్టాండ్స్ మార్చుకుంటూ స్విచ్ షాట్లతో రెండు చూడచక్కని ఫోర్లు కొట్టిన ఆమ్లా ఇన్నింగ్స్ చివరి ఓవర్ వేసిన థంపీ బౌలింగ్‌లో కళాత్మక సిక్స్‌తో 59 బంతుల్లోనే శతకాన్ని అందుకున్నాడు. తాజా సీజన్‌లో ఆమ్లాకు ఇది రెండో శతకం.. ముంబయి ఇండియన్స్‌పై తొలి శతకాన్ని సీజన్ ఆరంభంలో ఆమ్లా నమోదు చేశాడు. గుజరాత్ బౌలర్లలో శాంగ్వాన్, కులకర్ణి, థంపీ తలో వికెట్ తీశారు.