ఆమ్లా మెరుపు శతకం.. ముంబయి టార్గెట్ 199

ఐపీఎల్ పదో సీజన్‌లో భాగంగా ముంబయి ఇండియన్స్‌తో ఇండోర్‌ వేదికగా జరుగుతున్న మ్యాచ్‌లో కింగ్స్ ఎలెవన్ పంజాబ్ ఓపెనర్ హసీమ్ ఆమ్లా (104 నాటౌట్: 60 బంతుల్లో 8x4, 6x6) శతకంతో శివాలెత్తిపోయాడు. దీంతో తొలుత బ్యాటింగ్ చేసిన పంజాబ్ 4 వికెట్ల నష్టానికి 198 పరుగులు చేసింది. సీజన్‌లో తొలి మ్యాచ్ ఆడిన షాన్ మార్ష్ (26: 21 బంతుల్లో 5x4) తొలి ఓవర్ నుంచే బాదుడు మొదలెట్టగా.. హసీమ్ ఆమ్లా కూడా బ్యాట్ ఝళిపించడతో 5.5 ఓవర్లోనే పంజాబ్ 46 పరుగులు చేయగలిగింది. ఈ దశలో మెక్లనగాన్ తెలివైన బంతితో షాన్ మార్ష్‌ని పెవిలియన్‌కి పంపగా.. అనంతరం వచ్చిన సాహా (11)ని స్పిన్నర్ క్రునాల్ పాండ్య బుట్టలో వేశాడు. దీంతో 11 ఓవర్లు ముగిసే సమయానికి 80/2తో నిలిచిన పంజాబ్ తక్కువ స్కోరుకే పరిమితమయ్యేలా కనిపించింది.

సాహా ఔట్ అనంతరం క్రీజులో వచ్చిన మాక్స్‌వెల్ (40: 18 బంతుల్లో 4x4, 3x6) భారీ షాట్లతో ముంబయి బౌలర్లపై విరుచుకుపడ్డాడు. ఇన్నింగ్స్ 15వ ఓవర్ వేసిన మెక్లనగాన్ బౌలింగ్‌లో మాక్స్‌వెల్ 6, 6, 4, 4, 6 బాదేసి ఆ ఓవర్‌లో 28 పరుగులు రాబట్టాడు. దీంతో మరో ఎండ్‌లో 34 బంతుల్లోనే అర్ధశతకం పూర్తి చేసుకుని నిలకడగా ఆడుతున్న ఆమ్లా కూడా బ్యాట్ ఝళిపించేశాడు. ఇన్నింగ్స్ 16వ ఓవర్ వేసిన లసిత్ మలింగ బౌలింగ్‌లో ఆమ్లా కూడా రెండు సిక్స్‌లు, రెండు ఫోర్లు బాది 22 పరుగులు రాబట్టడంతో పంజాబ్ స్కోరు దూసుకెళ్లింది. ప్రమాదకరంగా మారిన ఈ జోడిని తర్వాత ఓవర్‌లో మాక్స్‌వెల్‌ని బౌల్డ్ చేయడం ద్వారా బుమ్రా విడదీయడంతో ముంబయి ఊపిరి పీల్చుకుంది. కానీ ఇన్నింగ్స్ చివరి ఓవర్ వేసిన మలింగ బౌలింగ్‌లో వరుసగా రెండు సిక్స్‌లు బాదిన ఆమ్లా 58 బంతుల్లోనే శతకాన్ని పూర్తి చేసుకున్నాడు. ముంబయి బౌలర్లలో మెక్లనగాన్ రెండు వికెట్లు తీయగా.. క్రునాల్, బుమ్రా చెరో వికెట్ తీశారు.