ప్లేబాయ్ కింగ్@61...
వెస్ట్ జావాలోని మజలెంగ్కాకు చెందిన ఖాన్ (61) ... ఇప్పటికే 87సార్లు పెళ్లి చేసుకున్నాడు. అయినా సరే మరోసారి పెళ్లికి రెడీ అయిపోయాడు. అయితే ఈసారి తన మాజీ భార్యనే తాజాగా పెళ్లి చేసుకోబోతున్నాడు. ఆమె ఖాన్ నుంచి విడిపోయినా.. అతనినే ప్రేమిస్తూ ఉండిపోయిందంట. అందుకే మళ్లీ ఆమెను వివాహం చేసుకోవడానికి సిద్ధపడ్డాడు. ఇన్ని పెళ్లిళ్లు చేసుకున్నాడు గనుక ఖాన్.. పెద్ద ధనవంతుడేమోననే భావన కలుగుతుంది. కానే కాదు. ఓ సామాన్య రైతు. కాకపోతే ఇన్ని పెళ్లిళ్లు చేసుకున్నాడు కాబట్టి ఆయనకు "ప్లేబాయ్ కింగ్" అనే పేరు వచ్చింది. అందరూ ఖాన్‌ను అలాగే పిలుస్తుంటారు.
14 ఏళ్లకే మొదలుపెట్టేశాడు..
ఖాన్.. చిన్న వయస్సులోనే పెళ్లిళ్ల దండయాత్ర మొదలుపెట్టేశాడు. 14 ఏళ్లకు తొలిసారి కళ్యాణం చేసుకున్నాడు. అతని మొట్టమొదటి భార్య అతని కంటే రెండేళ్ల పెద్దది. అయితే తన పేదరికం కారణంగా పెళ్లైన రెండేళ్లకే విడాకులు తీసుకుని వెళ్లిపోయింది. ఈ సంఘటన తర్వాతే ఖాన్‌కు చాలా కోపం వచ్చిందంట. భార్య తనను వదిలి వెళ్లిపోవడంతో ఎంతో వేదనకు గురయ్యాడు.
ప్రేమలో పడేసి...
మొదటి భార్యతో విడాకులైన తర్వాత చాలామంది మహిళలు తనతో ప్రేమలో పడేలా చేసుకోవాలని గట్టిగా నిర్ణయించుకున్నట్టు ఖాన్ చెప్పాడు. మహిళలను ప్రేమించడం మొదలుపెట్టాడు. అందులో కొందరిని పెళ్లి చేసుకున్నాడు. తాను మహిళలను ఎవరిని ఇబ్బంది పెట్టనని, వారి భావోద్వేగాలతో ఆడుకోనని అందుకే తనతో చాలామంది ప్రేమలో పడతారని ఖాన్ చెప్పుకొచ్చాడు.
మాజీ భార్యతో మళ్లీ...
తాజాగా తన మాజీ భార్యనే పెళ్లి చేసుకోబోతున్న ఖాన్.. దానికి కూడా ఒక కారణం చెప్పాడు. ఆమె ఖాన్‌తో విడిపోయినా.. తననే ప్రేమిస్తూ ఉండిపోయిందని అందుకే మరోసారి ఆమెను మనువాడుతున్నాడని చెప్పాడు. వ్యభిచారం చేసే కంటే.. పద్ధతిగా పెళ్లి చేసుకుని కాపురం చేయడం మంచిదని ఖాన్ అన్నాడు. అంతేకాదు తన ప్రేమ కోసం ఎవరైనా వస్తే కాదనలేడంట.