టీచర్‌తో విద్యార్థి ప్రేమ.. ఆమెకు పెళ్లి ఫిక్స్ అయ్యిందని ఆత్మహత్య

టీచర్‌కు పెళ్లి కుదరిందని తెలియడంతో 17 ఏళ్ల ఓ యువకుడు ఆత్మహత్య చేసుకున్నాడు. తనకు ట్యూషన్ చెప్పిన ఆ టీచర్‌ను అతడు ప్రేమించడమే అందుక్కారణం. విద్యార్థి మృతికి కారణం మిస్టరీగా మారడంతో పోలీసులు ఈ ఘటనను సీరియస్‌గా తీసుకొని సమగ్ర దర్యాప్తు జరపడంతో విస్తుపోయే వాస్తవం వెలుగులోకి వచ్చింది. రెండేళ్లుగా ఆ కుర్రోడితో టీచర్ రిలేషన్‌షిప్‌లో ఉన్నట్లు పోలీసుల విచారణతో తేలింది. మరో వ్యక్తితో పెళ్లికి సిద్ధమై తనను దూరం పెట్టడంతో మైనర్ బాలుడు మనస్తాపానికి గురై ఈ అఘాయిత్యానికి ఒడిగట్టాడు. తమిళనాడు రాజధాని చెన్నై శివార్లలోని అంబత్తూరులో చోటు చేసుకున్న ఈ ఘటన సంచలనంగా మారింది. విద్యార్థి మరణానికి కారణమైన టీచర్‌పై పోక్సో (Protection of Children from Sexual Offences (POCSO) Act) చట్టం కింద కేసు నమోదు చేసిన పోలీసులు బుధవారం (అక్టోబర్ 12) ఆమెను అరెస్ట్ చేశారు.

చెన్నై సమీపంలోని అంబత్తూరుకి చెందిన బాధిత విద్యార్థి (17) ఈ ఏడాది 12వ తరగతి (ప్లస్‌టూ) పూర్తి చేశాడు. ఆగస్టు 30న తన స్నేహితులతో కలిసి చెన్నైలోని ఓ ఆర్ట్స్ కాలేజీలో కౌన్సెలింగ్‌కు హాజరయ్యాడు. ఇంటికి తిరిగొచ్చిన తర్వాత గదిలో ఉరేసుకొని ఆత్మహత్యాయత్నం చేశాడు. తల్లిదండ్రులు అది గుర్తించి ఆస్పత్రికి తరలిస్తుండగా మార్గమధ్యంలో మృతి చెందాడు. తమ కుమారుడు అకస్మాత్తుగా ఆత్మహత్య చేసుకోవడంతో షాక్‌కు గురైన తల్లిదండ్రులు.. అతడి ఆత్మహత్యకు కారణమేంటో తెలియక పోలీసులను ఆశ్రయించారు.

అంబత్తూరు పోలీసులు కేసు నమోదు చేసుకొని దర్యాప్తు చేపట్టారు. బాధితుడి బంధువులు, స్నేహితులను విచారించారు. అతడి సెల్ ఫోన్ స్వాధీనం చేసుకొని చూడగా.. కీలక ఆధారాలు లభించాయి. ఓ యువతితో సన్నిహితంగా ఉన్న ఫొటోలు, వీడియోలను ఫోన్‌లో పోలీసులు గుర్తించారు. ఆమె అతడికి ట్యూషన్ చెప్పిన టీచర్ అని గుర్తించారు. అనంతరం ఆ ట్యూషన్‌కు వెళ్లే ఇతర విద్యార్థులు, బాధితుడి ఫ్రెండ్స్‌ను ప్రశ్నించి మరిన్ని వివరాలు సేకరించారు.

అంబత్తూరులోని సర్‌ రామస్వామి ముదలియార్‌ హయ్యర్‌ సెకండరీ స్కూల్‌లో అతడు చదువుతున్నప్పుడు ఆమె అక్కడ తాత్కాలిక ఉపాధ్యాయురాలిగా పనిచేసింది. అక్కడ వారిద్దరికీ పరిచయం ఏర్పడింది. ఆ తర్వాత ఆమె సొంతంగా ప్రారంభించిన ట్యూషన్ అతడు వెళ్లాడు. ఈ క్రమంలో వారిద్దరి మధ్య సాన్నిహిత్యం పెరిగింది. ఆ సమయంలో విద్యార్థిని ప్రేమిస్తున్నట్లు చెప్పి లోబర్చుకున్నట్లు తెలుస్తోంది.

ఇటీవలే ఆమెకు మరో వ్యక్తితో నిశ్చితార్థం జరిగింది. ఆ విషయం తెలిసిన అతడు ఆమెను నిలదీసినట్లు తెలుస్తోంది. నిశ్చితార్థం జరిగిన వ్యక్తినే పెళ్లి చేసుకోవాలని ఫిక్స్ అయిన టీచర్ అతడిని దూరం పెట్టింది. అతడితో మాట్లాడటం మానేసింది. దీంతో ఆ విద్యార్థి మనస్తాపానికి గురయ్యాడు.