కరోనా వచ్చి యువతి అంబులెన్స్ ఎక్కితే.. కామంతో డ్రైవర్ అత్యాచారం

కరోనా బారినపడ్డ 19 ఏళ్ల యువతిపై అంబులెన్స్ డ్రైవర్ అత్యాచారానికి పాల్పడ్డాడు. కేరళలోని పఠానమిట్ట జిల్లాలో ఈ దారుణం చోటు చేసుకుంది. బాధితురాలిని ఐసోలేషన్ కేంద్రానికి తరలించే సమయంలో అంబులెన్స్‌ను నిర్మానుష్య ప్రాంతానికి తీసుకెళ్లి అఘాయిత్యం చేశాడు. ఘటన జరిగిన సమయంలో అంబులెన్స్‌లో ఇతర సిబ్బంది ఎవరూ లేకపోవడంతో నిందితుడు ఈ దారుణానికి ఒడిగట్టాడు.

పఠానమిట్ట జిల్లా పంథలమ్ ప్రాంతంలో 19 ఏళ్ల ఓ యువతి తన బంధువుల ఇంట్లో ఉంటోంది. ఆమె తనకు కరోనా లక్షణాలు బయటపడంతో పరీక్షలు నిర్వహించుకోగా.. శనివారం కొవిడ్-19 పాజిటివ్‌గా తేలింది. దీంతో ఆమెను ఐసోలేషన్ కేంద్రానికి తరలించడానికి అధికారులు ఏర్పాట్లు చేశారు. ఇందుకోసం 108 అంబులెన్స్‌ను పంపించారు.

అయితే.. బాధిత యువతితో పాటు కరోనా పాజిటివ్ వచ్చిన మరో మహిళను కూడా అదే అంబులెన్స్‌లో తరలించడానికి ఆరోగ్య సిబ్బంది ఏర్పాటు చేశారు. అంబులెన్స్‌లో డ్రైవర్‌ నౌఫాల్‌ (25)తో పాటు మరో ఇద్దరు మహిళా సిబ్బంది వచ్చారు. వాళ్లు బాధిత యువతితో పాటు కరోనా సోకిన మరో మహిళను తీసుకొని బయల్దేరారు.

ఇద్దరిని వేర్వేరు ప్రాంతాలకు తీసుకెళ్లాల్సి రావడంతో అంబులెన్స్ డ్రైవర్ మొదట మహిళను ఓ హాస్పిటల్‌లో వదిలేశాడు. ఈ సమయంలో అంబులెన్స్‌లో ఉన్న ఇద్దరు మహిళా సిబ్బంది ఆ మహిళ వెంట వెళ్లిపోయారు. ఇదే అదనుగా భావించిన అంబులెన్స్ డ్రైవర్ నౌఫాల్.. వాహనాన్ని నిర్మానుష్య ప్రాంతానికి తీసుకెళ్లి యువతిపై అత్యాచారానికి పాల్పడ్డాడు.

ఆ తర్వాత అర్ధరాత్రి బాధిత యువతిని కరోనా సంరక్షణ కేంద్రం వద్ద వదిలేసి వెళ్లిపోయాడు. బాధితురాలు తనకు జరిగిన అన్యాయం గురించి అక్కడి ఆరోగ్య సిబ్బందికి చెప్పుకొని కంటతడి పెట్టింది. ఆమె ఫిర్యాదు మేరకు అరన్ములా పోలీసులు కేసు నమోదు చేసుకున్నారు. డ్రైవర్‌ నౌఫాల్‌ను అదుపులోకి తీసుకొని ప్రశ్నిస్తున్నట్లు తెలిపారు.

ఘటనపై కేరళ ఆరోగ్య శాఖ మంత్రి కేకే శైలజ దిగ్భ్రాంతి వ్యక్తం చేశారు. డ్రైవర్‌ను వెంటనే విధుల నుంచి తొలగించాలని 108 సర్వీస్ భాగస్వామి సంస్థకు సూచించారు. ‘ఇదొక షాకింగ్ ఘటన. నిందితుడికి కఠిన శిక్ష పడేలా చర్యలు తీసుకోవాలని పోలీసులను కోరుతున్నాను’ అని ఆమె పేర్కొన్నారు.

Also Read: 7 నెలల గర్భిణి, పరీక్ష కోసం స్కూటీపై 1300 కిమీ.. ఎన్నో కష్టాలు, ఇక జాబ్ ఖాయమే!

Must Read: జనం నిర్లక్ష్యంతో కొడుకును కోల్పోయిన టీచర్.. విషాదాన్ని విజయంగా మార్చారు!