వైన్ షాపు లూటీ.. 40 బీర్లు, 20 కేసుల మందు చోరీ

కరోనా లాక్‌డౌన్‌తో ఓ వైపు నేరాల సంఖ్య తగ్గుతుంటే.. మరోవైపు మద్యం దొంతనాలు ఎక్కువైపోతున్నాయి. ఏకంగా షాపులే బద్దలుకొట్టి మరీ దోచుకుపోతున్నారు మందుబాబులు. మద్యానికి బానిసై చుక్కపడనిదే బతకలేక చోరీలకు తెగబడుడుతున్నారు. అర్ధరాత్రి వేళ రెండు మద్యం దుకాణాల్లోకి ప్రవేశించి బీర్లు, మద్యం సీసాలను దొంగిలించిన ఘటన ఛత్తీస్‌గఢ్ రాజధాని రాయ్‌పూర్‌లో జరిగింది.

కరోనా మహమ్మారి నేపథ్యంలో ప్రభుత్వం లాక్‌డౌన్ విధించింది. అందులో భాగంగా మద్యం షాపులను కూడా మూసేయడంతో మద్యానికి ఎక్కడ లేని గిరాకీ పెరిగింది. చుక్క గొంతులో పడక మందుబాబులు మద్యం కోసం తహతహలాడుతున్నారు. మందు దొంగతనానికి పాల్పడుతున్నారు. రాయ్‌పూర్‌లోని అమ్లిది, అవంతి విహార్ ప్రాంతాల్లో ఉన్న రెండు మద్యం దుకాణాలను దోచుకెళ్లారు. రెండు షాపులను పగలగొట్టి మరీ లోపలికి ప్రవేశించి మద్యం సీసాలను చోరీ చేశారు.

Also Read: మరో ప్రణయ్ బలి.. కూతురి భర్తని కత్తులతో పొడిచి.. దారుణం

గోడకి కన్నం పెట్టి అమ్లిది ఏరియాలోని మద్యం దుకాణంలోకి ప్రవేశించిన దుండగలు 40 బీర్ సీసాలను అపహరించారు. అవంతి విహార్ వైన్ షాప్ గ్రిల్స్ విరగ్గొట్టి ఏకంగా 20 మద్యం కేసులను ఎత్తుకెళ్లారు. అయితే దుకాణాల్లో కౌంటర్‌లో ఉన్న నగదును కనీసం ముట్టుకోకపోవడం విశేషం. కేవలం మద్యం సీసాలు మాత్రమే దొంగిలించడంతో ఇది మందుబాబుల పనేనని అనుమానిస్తున్నారు.

ఛత్తీస్‌గఢ్‌లో మద్యం దుకాణాలను ప్రభుత్వమే నిర్వహిస్తోంది. దేశవ్యాప్తంగా లాక్‌డౌన్ అమలు చేస్తుండడంతో రాష్ట్రంలోని వైన్ షాపులు కూడా మూతపడ్డాయి. లాక్‌డౌన్ వచ్చేనెల 14 వరకూ అమల్లో ఉంటుందని.. అప్పటి వరకు మద్యం దుకాణాలు మూసే ఉంటాయని తెలుస్తోంది. ఇప్పటికే కొన్నిచోట్ల మద్యం దొరక్క మందుబాబులు దారుణాలకు పాల్పడుతున్నారు. ఆత్మహత్య ఘటనలు కూడా వెలుగుచూశాయి. మరో 15 రోజులు డ్రై డే పాటించడమంటే మందుబాబులకు కష్టమే.

Read Also: కరోనా పేషెంట్ల ఇళ్లలో లూటీ.. కిటికీలు పగలగొట్టి దొంగల బీభత్సం