సీసీటీవీ వీడియో: కొడుకును దారుణంగా చంపిన తండ్రి.. చంపేంత కారణం లేకపోయినా!

చెట్టంత కొడుకును కన్నతండ్రే కిరాతకంగా చంపాడు. కొడుకు పని చేసుకుంటుండగా వెనక నుంచి వచ్చి ఏమాత్రం అనుమానం రాకుండా సుత్తి తీసుకొని తలపై బాదాడు. మరణించేంత వరకు తలపై కొడుతూనే ఉన్నాడు. దీంతో అతడు రక్తపుమడుగులో పడి అక్కడికక్కడే మృతి చెందాడు. విశాఖపట్నం జిల్లా పెందుర్తి సమీపంలోని చినముషిడివాడలో బంగారమ్మ కాలనీలో బుధవారం (ఆగస్టు 12) ఈ ఘటన చోటు చేసుకుంది. ఘటనకు సంబంధించిన దృశ్యాలు సీసీటీవీ కెమెరాల్లో నమోదయ్యాయి.

గతంలో మర్చంట్ నేవీలో సీమెన్‌గా పనిచేసిన గొరిపాటి వీర్రాజు(72) కుటుంబం పెందుర్తి శివారు చిన్నముసిడివాడలో నివాసం ఉంటుంది. వీర్రాజు కుమారుడు జలరాజు (42) కూడా సీమెన్‌గా పని చేస్తున్నాడు. జలరాజు ఇటీవల చిన్నముసిడివాడలో సొంతింటి నిర్మాణం చేపట్టాడు. ఈ నేపథ్యంలో అతడి ముగ్గురు చెల్లెళ్లకు కొంత డబ్బు ఇవ్వాల్సిందిగా తండ్రి వీర్రాజు సూచించాడు. ఈ విషయంలో తండ్రీ కొడుకుల మధ్య ఘర్షణ తలెత్తినట్లు తెలుస్తోంది.

డబ్బు సమకూరుస్తామని, కొంత గడువు ఇవ్వాలని తండ్రిని జల కోరిన జలరాజు ఇంటి నిర్మాణ పనులు కొనసాగిస్తున్నట్లు సమాచారం. ఈ క్రమంలో బుధవారం ఉదయం తండ్రీ కొడుకుల మధ్య వాగ్వాదం చోటు చేసుకున్నట్లు సమాచారం. ఆ తర్వాత వీర్రాజు.. ఇంట్లో పని చేసుకుంటున్న జలరాజును వెనుక నుంచి వచ్చి అక్కడే ఉన్న సుత్తితో తలపై విచక్షణారహితంగా కొట్టాడు. దీంతో జలరాజు రక్తమోడుతూ అక్కడే పడిపోయాడు.

విషయం తెలుసుకున్న కుటుంబ సభ్యులు ఆస్పత్రికి తరలించే ప్రయత్నం చేసినప్పటికీ అప్పటికే అతడు ప్రాణాలు కోల్పోయాడు. ప్రాణాలు పోయాయో, లేవో గమనిస్తూ వీర్రాజు తన కొడుకును సుత్తితో బాదడం సీసీటీవీ ఫుటేజీల్లో కనిపిస్తోంది. హత్య చేసేంత కారణాలు లేనప్పటికీ వీర్రాజు సొంత కొడుకుని అంత కర్కశంగా కడతేర్చిన అంశం స్థానికంగా చర్చనీయంగా మారింది.

వీర్రాజుపై మర్డర్ కేసు నమోదు చేసి దర్యాప్తు చేస్తున్నట్లు విశాఖ వెస్ట్ ఏసీపీ స్వరూపారాణి తెలిపారు. పోలీసులు సీసీటీవీ ఫుటేజీ పరిశీలించి ఆధారాలు సేకరించారు.

Also Read: ఎక్కిళ్లు.. కరోనా వైరస్ కొత్త లక్షణం

Must Read: సెల్‌ఫోన్‌ పేలి తల్లి, ఇద్దరు చిన్నారుల మృతి