రాత్రివేళ పక్కింటికి వెళ్లిన భార్య.. ఉదయాన్నే షాకిచ్చిన భర్త

మద్యానికి బానిసైన తేజు కుటుంబాన్ని పట్టించుకోకుండా జులాయిగా తిరుగుతున్నాడు. దీంతో అతడి భార్యే కుటుంబాన్ని భారంగా నెట్టుకొస్తోంది. ఆదివారం గ్రామంలో వారపు సంతకు భార్య వెళ్లింది. అదే సమయంలో భారీ వర్షం కురవడంతో చాలాసేపు సంతలోనే ఉండిపోయింది.

వర్షం తగ్గాక ఇంటికి చేరుకున్న భార్యను తేజు అనుమానించాడు. ఇంతసేపు ఎవరితో ఉన్నావంటూ ఆమెను దుర్భాషలాడాడు. వర్షం పడటంతో ఇంటికి రావడం ఆలస్యమైందని, తనపై అకారణంగా నిందలు వేయొద్దని వారించింది. భార్య ఎదురు చెప్పడంతో రెచ్చిపోయిన అతడు తీవ్రంగా కొట్టాడు. ఆమె కేకలు విన్న స్థానికులు అక్కడికి చేరుకుని తేజును వారించారు.

మద్యం మత్తులో ఉండటంతో రాత్రివేళ భార్య, పిల్లలపై అఘాయిత్యానికి పాల్పడతాడేమోనన్న భయంతో అతడిని ఒంటరిగా వదిలేశారు. దీంతో అతడి భార్య పక్కనే ఉండే జగన్మోహన్‌ ఇంట్లోను, పిల్లలు అదే గ్రామంలో ఉండే అమ్మమ్మ ఇంట్లోను పడుకున్నారు. సోమవారం ఉదయం నిద్రలేచిన తర్వాత స్ధానికులు తేజుకు నచ్చజెప్పి భార్యను పంపిద్దామని ఇంటికి వెళ్లారు.

ఎన్నిసార్లు పిలిచినా అతడు తలుపు తీయకపోవడంతో అనుమానం వచ్చి కిటికీలో నుంచి చూడగా ఫ్యాన్‌కు వేలాడుతూ కనిపించాడు. దీంతో షాకైన స్థానికులు వెంటనే పోలీసులకు సమాచారమిచ్చారు. కాసేపటికే పోలీసులు అక్కడికి చేరుకుని తేజు మృతదేహాన్ని ఆస్పత్రికి తరలించారు. దంపతుల మధ్య తగాదాను తీరుద్దామనుకున్న స్థానికులు తేజు ఆత్మహత్యతో విషాదంలో మునిగిపోయారు.