పోలీస్ ఆఫీసర్‌నై నాన్నపై ప్రతీకారం.! కంటతడి పెట్టిస్తున్న కూతురి సూసైడ్‌ నోట్‌

తాగుబోతు తండ్రి వేధింపులు భరించలేకపోయిన ఓ కూతురు ఆత్మహత్య చేసుకుని చనిపోయింది. పదో తరగతి చదువుతున్న కూతురిని మద్యం మత్తులో తండ్రి చావబాదడంతో మనస్థాపానికి గురైన బాలిక బలవన్మరణానికి పాల్పడింది. తండ్రి వేధింపులను వివరిస్తూ చనిపోయే ముందు తాను రాసిన సూసైడ్ నోట్ హృదయాలను బరువెక్కిస్తోంది. తన ఆశలు నెరవేరకుండానే ఈ లోకాన్ని విడిచి వెళ్లిపోతున్నానంటూ ఆ బాలిక రాసిన సూసైడ్ నోట్ కంటతడి పెట్టిస్తోంది. ఈ విషాద సంఘటన ఉత్తర్ ప్రదేశ్‌లో వెలుగుచూసింది.

మద్యానికి బానిసగా మారి కట్టుకున్న భార్యని, కడుపున పుట్టిన బిడ్డలను హింసిస్తున్న ఓ తండ్రి దురాగతాలకు కూతురు బలైపోయింది. తండ్రి వేధింపులను భరించలేక ఉరి వేసుకుని ఆత్మహత్య చేసుకుంది. ఆగ్రాలోని సదర్ ప్రాంతానికి చెందిన అమర్ సింగ్‌కి భార్య, ముగ్గురు పిల్లలు ఉన్నారు. పాతికేళ్ల కిందట అమర్ సింగ్‌కి వేరే మహిళతో వివాహమైంది. ముగ్గురు పిల్లలు ఉండేవారు. వారంతా మంటల్లో కాలిబూడిదయ్యారు.

Also Read: వలసకూలీల దోపిడీలు.! అపోహతో ముగ్గురిని కొట్టిచంపేసిన ట్రైబల్స్.. దారుణం

అప్పట్లో అమర్ సింగ్‌పై కేసు కూడా నమోదైంది. అయితే ఆ కేసును పెద్దల సమక్షంలో రాజీ చేసుకుని రెండో వివాహం చేసుకున్నాడు. ఆమెకి ముగ్గురు పిల్లలు సంతానం కలిగారు. మద్యానికి బానిసైన అమర్ సింగ్ తరచూ ఇంట్లోనే దుకాణం పెట్టేవాడు. స్నేహితులు, సమీప బంధువులను ఇంటికే పిలిచి మందు పార్టీలు చేసుకునేవాడు. మద్యం మత్తులో భార్యాపిల్లలని చిత్రహింసలకు గురి చేసేవాడు.

Read Also: భార్యని చంపి చెరువులో పడేసి.. 3 రోజుల తర్వాత బయటికి తీసి.. చిత్తూరులో షాకింగ్..

ఓ రోజు మద్యం మత్తులో పదో తరగతి చదువుతున్న కూతురిని తాగుబోతు తండ్రి తీవ్రంగా కొట్టాడు. దీంతో మనస్థాపానికి గురైన బాలిక రెండో అంతస్తులోని గదిలోకి వెళ్లి ఉరేసుకుని ఆత్మహత్య చేసుకుంది. చనిపోతూ ఆమె రాసిన సూసైడ్ లెటర్ గుండెలను బరువెక్కిస్తోంది. తండ్రి వేధింపులు భరించలేకపోయిన కూతురు.. పోలీస్ ఆఫీసర్‌‌ని అయి ప్రతీకారం తీర్చుకోవాలనుకుంది. కానీ ఆ ఆశలు నెరవేరకుండానే చనిపోతున్నానంటూ రాసిన లేఖ పలువురిని కంటతడి పెట్టించింది. కేసు నమోదు చేసుకున్న పోలీసులు బాలిక ఆత్మహత్యకు కారణమైన తండ్రిని అరెస్టు చేసి కటకటాల వెనక్కి నెట్టారు.

Also Read: చావుబతుకుల్లో భర్త.. ఆస్పత్రికి తీసుకెళ్తూ భార్య మృతి.. విశాఖలో విషాదం