మాజీ సీఎం కమల్‌నాథ్ సోదరుడు, మరదలు దారుణ హత్య

మధ్యప్రదేశ్ మాజీ ముఖ్యమంత్రి, కాంగ్రెస్ సీనియర్ నేత కమల్‌నాథ్ సోదరుడు (కజిన్ బ్రదర్) నరేంద్రనాథ్ (70), ఆయన భార్య సుమన్ (65) దారుణ హత్యకు గురయ్యారు. ఉత్తర్ ప్రదేశ్‌లోని గ్రేటర్ నోయిడాలో జరిగిన ఈ దారుణం ఆలస్యంగా వెలుగులోకి వచ్చింది. నరేంద్రనాథ్ మృతదేహాన్ని శుక్రవారం (ఫిబ్రవరి 5) ఉదయం ఆయన ఇంటి బేస్‌మెంట్‌లో బట్టల కుప్పలో గుర్తించారు. సుమన్ తొలి అంతస్తులోని హాలులో విగతజీవిగా పడిఉన్నారు.

నరేంద్రనాథ్‌ నోట్లో గుడ్డలు కుక్కి, కట్టిపడేసి గొంతు నులిమి హత్య చేసినట్లు ఆయన మృతదేహంపై ఉన్న గాయాలను బట్టి తెలుస్తోంది. ఆయన భార్యపైనా దాడి చేసి ఆపై ఛాతీపై కాల్చి చంపారు. పోలీసులు కేసు నమోదు చేసుకొని దర్యాప్తు చేస్తున్నారు. స్థానికంగా ఈ ఘటన సంచలనంగా మారింది. ఇంత దారుణానికి ఒడిగట్టిన వారు ఎవరై ఉంటారని స్థానికులు చర్చించుకుంటున్నారు.

ఢిల్లీలో నరేంద్రనాథ్‌ విడి భాగాల వ్యాపారం నిర్వహిస్తున్నారు. గ్రేటర్ నోయిడాలోని అల్పా 2 సెక్టార్‌లో ఆయనకు మూడంతస్తుల భవనం ఉంది. నరేంద్రనాథ్ వడ్డీ వ్యాపారం కూడా చేస్తుంటారు. పరిచయస్థులు, చుట్టుపక్కల వాళ్లు ఆయన వద్ద రుణాలు తీసుకుంటూ ఉంటారు. ఆయన భార్య సుమన్ ఢిల్లీకి చెందిన ఓ ఎన్‌జీవోలో యోగా అభ్యసిస్తున్నారు.

నరేంద్రనాథ్ తరచూ ఆయన ఇంటి బేస్‌మెంట్‌లో చిరు వ్యాపారులు, కూలీలు, ఎలక్ట్రీషియన్లను కలుస్తుంటారని స్థానికులు తెలిపారు. పరిచయస్థులతో తన ఇంట్లో తరచూ మద్యం తాగుతుంటారు. గురువారం రాత్రి ఆయన కొంతమందిని పార్టీ కోసం ఇంటికి ఆహ్వానించినట్లు పోలీసుల ప్రాథమిక విచారణలో తేలింది. ఘటనా స్థలంలో వైన్ గ్లాసులు, మందు సీసాలు, నూడుల్స్, సిగరెట్లు లాంటి వాటిని దర్యాప్తు అధికారులు గుర్తించారు.

గురువారం రాత్రి తన కుమార్తెతో ఫోన్‌లో మాట్లాడిన సుమన్.. బేస్‌మెంట్‌లో పార్టీ జరుగుతున్నట్టు చెప్పారు. అక్కడ మద్యం తాగుతున్నారని, తింటున్నారని కాబట్టి అక్కడికి వెళ్లడం తనకు ఇష్టంలేదని కుమార్తెకు తెలిపారు. పార్టీకి వచ్చిన వారిలోనే ఎవరో ఈ హత్యలకు పాల్పడి ఉంటారని బంధువులు అనుమానిస్తున్నారు.

ఇంట్లో రూ.25 వేల నగదు, సుమన్ నగలు కనిపించకుండా పోయాయని కుటుంబసభ్యులు తెలిపారు. పోలీసులు బృందాలుగా ఏర్పడి కేసు దర్యాప్తు చేస్తున్నారు. సీసీటీవీ ఫుటేజీలను పరిశీలించి నిందితులను గుర్తించే ప్రయత్నం చేస్తున్నారు.