హయత్‌నగర్ అమ్మాయి కిడ్నాపర్‌ది ఘోరమైన నేరచరిత్ర.. ఆందోళనలో తల్లిదండ్రులు

హయత్‌నగర్ యువతి సోనీ కిడ్నాప్ ఘటన నేటికీ మిస్టరీగానే మారింది. విజయవాడకు చెందిన కరుడుగట్టిన నేరగాడు రవిశేఖర్ ఆమెను అపహరించినట్లు పోలీసులు భావిస్తున్నారు. అతడి కోసం వేట ముమ్మరం చేశారు. మైనర్‌గా ఉన్నప్పటి నుంచే పలు నేరాలు చేసిన రవిశేఖర్ పరమ దుర్మార్గుడని స్థానికులు చెబుతున్నారు. అలాంటి వాడు అమ్మాయిని కిడ్నాప్ చేసిన విషయం తెలిసి ఆందోళనకు గురవుతున్నారు.

రవిశేఖర్ నేర చరిత్ర చాంతాడంత ఉంది. మైనర్‌గా ఉండగానే అతడు అనేక నేరాలకు పాల్పడ్డాడు. అతడి కోసం హైదరాబాద్ పోలీసులు విజయవాడలో గాలిస్తున్నారు. రవిశేఖర్ కుమారుడు రాజయ్య, అతడి తల్లి చిట్టెమ్మను ప్రశ్నిస్తున్నారు. అతడిపై గతంలో ఉన్న కేసులపై ఆరా తీస్తున్నారు.

Read Also: హయత్ నగర్ కిడ్నాప్.. తండ్రిని పక్కదారి పట్టించి యువతితో కారులో పరార్

రవిశేఖర్‌పై 1996లో తొలి కేసు నమోదైంది. కంకిపాడులో ఓ మహిళ వద్ద నుంచి బంగారు నగలు కాజేశాడు. దొంగతనాల నుంచి మొదలుపెట్టి ఆ తర్వాత అనేక నేరాలకు పాల్పడ్డాడు. వివిధ పోలీస్ స్టేషన్లలో లెక్కకు మిక్కిలి కేసులు నమోదయ్యాయి. పలు దొంగతనం కేసుల్లో అరెస్టై శిక్ష అనుభవించినా రవిశేఖర్ ప్రవర్తనలో మార్పు రాలేదు. స్థానికంగా తనను గుర్తుపడుతున్నారని.. క్రమంగా పక్క జిల్లాల్లో, పక్క రాష్ట్రాల్లో దొంగతనాలకు పాల్పడ్డాడు.

20కి పైగా పోలీస్ స్టేషన్లలో రవిశేఖర్‌పై రౌడీషీట్లు ఓపెన్ చేశారంటే.. అతడి నేర ప్రవృత్తి ఏ స్థాయిలో ఉందో అర్థం చేసుకోవచ్చు. రవిశేఖర్‌పై పోలీసులు డోషియర్ షీట్ ఓపెన్ చేశారు. నేర స్వభావం అధికంగా ఉన్న అతి కొద్ది మంది వ్యక్తులపై మాత్రమే డోషియర్ షీట్ ఓపెన్ చేస్తారు. 2014లో విజయనగరంలో రవిశేఖర్‌ను పోలీసులు ఒక కేసులో అరెస్టు చేసి కోర్టుకు తీసుకెళ్తుండగా.. ఎస్కార్ట్ కళ్లుగప్పి పారిపోయాడు. విజయవాడ వస్తుంటే కంకిపాడు పోలీసులు పక్కా ప్రణాళికతో అతణ్ని బస్సులో పట్టుకున్నారు.

రెండు నెలల కిందట మరో కేసులో రవిశేఖర్ వైజాగ్‌లో కోర్టుకు హాజరయ్యాడు. ఆ సమయంలోనే రవిశేఖర్ తల్లి చిట్టెమ్మ కోర్టులో అతడిని కలిశారు. నేరాలు మానేసి ఇంటికి తిరిగి వచ్చేయాలని కుమారుణ్ని ప్రాధేయపడ్డారు. ఇకపై నేరాలు చేయనని.. ఇంటికి తిరిగొచ్చేస్తానని తల్లికి మాటిచ్చిన రవిశేఖర్.. అదే రోజు సాయంత్రం అతడిని తిరిగి జైలుకు తీసుకెళ్తుండగా పోలీసుల కళ్లుగప్పి పారిపోయాడు.

ఎస్కార్ట్ పోలీసుల కళ్లుగప్పి కర్ణాటక వెళ్లిన రవిశేఖర్.. అక్కడ సీబీఐ అధికారినంటూ ఒక వ్యక్తిని మోసం చేసి అతడి కారును దొంగిలించాడు. ఆ తర్వాత నేరుగా హైదరాబాద్ వచ్చి హయత్‌నగర్‌లో యువతి సోనీని సినీ పక్కీలో కిడ్నాప్ చేశాడు.