బరువు 250 కిలోలు.. కారులో పట్టక ట్రక్కు
అతడే ముఫ్తీ అబు అబ్దుల్ బారీ. 560 పౌండ్లు (సుమారు 250 కిలోలు) బరువుండే ఈ ఐసిస్ ముష్కరుడిని ఎలా తరలించాలో బలగాలకు అర్థం కాలేదు. కారులో ఎక్కించడానికి ప్రయత్నించి విఫలమయ్యారు. ఇక చేసేది లేక ఓ పికప్ ట్రక్కును తీసుకొచ్చి జైలుకు తరలించారు. ఇరాక్ పోలీసులు తెలిపిన వివరాల ప్రకారం.. ముఫ్తీ విద్వేష ప్రసంగాలు ఇవ్వడంలో దిట్ట. యువతను ఐసిస్ సానుభూతిపరులుగా మార్చడంలో కీలక పాత్ర పోషిస్తున్నాడు.
ఐసిస్ వ్యతిరేకులపై ఫత్వాలు
ఐసిస్లో చేరి తదనంతర కాలంలో వ్యతిరేకంగా మారిన వారిని చంపేయాలని అబు ‘ఫత్వా’లు కూడా జారీ చేసినట్లు ఆధారాలు ఉన్నాయి. అలాగే ఐసిస్కు విధేయులుగా ఉండేందుకు నిరాకరించిన ఇస్లామిక్ గురువులను హతమార్చాలని కూడా ‘ఫత్వా’లిచ్చాడని అంటున్నారు. దేశానికి, భద్రతా దళాలకు వ్యతిరేకంగా భీకర వ్యాఖ్యలు చేయడంలోనూ ఇతడు సిద్ధహస్తుడు. ‘ఐసిస్ గ్యాంగ్స్కు’ నేతృత్వం వహించేవాడు.
‘జబ్బా ది జిహాదీ’గా ఫేమస్
సామాజిక మాధ్యమాల్లో ఇతడిని ‘జబ్బా ది జిహాదీ’గా పిలుస్తారని తెలుస్తోంది. జబ్బా అరెస్టు సోషల్ మీడియాలో సంచలనం సృష్టించింది. దేవుడు తమవెనకే ఉన్నాడని భావించే ఐసిస్ దుండగులకు ఇదో భారీ షాక్ అని పలువురు వ్యాఖ్యానిస్తున్నారు. అలాగే ఇతగాడి భారీకాయాన్ని అపహాస్యం చేస్తూ అతని ఫొటోలతో లండన్లోని ఇస్లాం తీవ్రవాద వ్యతిరేక యాక్టివిస్టు మాజిద్ నవాజ్ అనే వ్యక్తి ఫేస్బుక్లో పోస్టులు పెట్టాడు. ఊబకాయాన్ని తాను తప్పుపట్టట్లేదని, ఇస్లామిక్ తీవ్రవాదుల హిపోక్రసీని మాత్రమే తను బయటపెడుతున్నానని ఆయన ట్వీట్ చేశారు.