ఏడేళ్ల క్రితం వివాహం
చిక్కమంగళూరు జిల్లా కడూరులో డాక్టర్ రేవంత్ ఉడుపిలోని లక్ష్మీనగరకు చెందిన బసవరాజప్ప కుమార్తె కవితతో ఏడేళ్ల క్రితం వివాహమైంది. వీరికి ఇద్దరు కుమారులు(ఐదేళ్లు, 6నెలలు) ఉన్నారు. బీరూరులో డెంటల్ క్లినిక్ నడుపుతున్న రేవంత్‌కు బెంగళూరుకు చెందిన ఫ్యాషన్ డిజైనర్ హర్షిత(32)తో పరిచయం ఏర్పడి వివాహేతర సంబంధానికి దారితీసింది.
తనతో వచ్చేయాలని ప్రియురాలి ఒత్తిడి
భార్యకు విడాలిచ్చి తన దగ్గరికి వచ్చేయాలని హర్షిత ప్రియుడిని కొద్దిరోజులుగా కోరుతోంది. ఈ క్రమంలోనే 17వ తేదీన కవిత ఇంట్లోనే అనుమానాస్పద స్థితిలో మృతిచెందింది. తన భార్యను ఎవరో హత్య చేశారని రేవంత్ ఫిర్యాదు చేయడంతో కడూరు పోలీసులు కేసు నమోదు చేసి దర్యాప్తు చేపట్టారు. గురువారం డాక్టర్లు ఇచ్చిన కవిత పోస్టుమార్టం రిపోర్టులో ఆమెకు మత్తు ఇంజెక్షన్ ఇచ్చి గొంతు నులిమి చంపేసినట్లు వెల్లడైంది. దీంతో పోలీసులకు రేవంత్‌పై అనుమానం కలిగింది.
కాల్స్‌డేటాతో గుట్టురట్టు
దీంతో అతడి కాల్స్‌డేటాను పరిశీలించగా భార్యను హత్య చేసే విషయంపై ప్రియురాలితో మాట్లాడిన కాల్స్ గుర్తించారు. ఈ విషయం తెలుసుకున్న రేవంత్ శుక్రవారం చిక్కమంగళూర్ జిల్లా కడూరు తాలూకు బండికొప్పలు వద్ద రైలు కింద పడి ఆత్మహత్య చేసుకున్నాడు. అంతకు కొద్ది నిమిషాల ముందు తాను సూసైడ్ చేసుకుంటున్నట్లు రేవంత్ హర్షితకు ఫోన్ చేసి చెప్పాడు.
ప్రియుడి మరణవార్త తెలిసి హర్షిత సూసైడ్
ప్రియుడి ఆత్మహత్యతో మనస్తాపం చెందిన హర్షిత బెంగళూరులోని ఆర్ఆర్ నగర జవరేగౌడ లేఔట్‌లోని తన నివాసంలో ఆత్మహత్య చేసుకుంది. ప్రియుడి మరణం తట్టుకోలేకే ఆత్మహత్య చేసుకుంటున్నట్లు సూసైడ్ నోట్‌లో పేర్కొంది. ఈ ఘటనపై పోలీసులు దర్యాప్తు చేస్తున్నారు. అక్రమ సంబంధం ముగ్గురి ప్రాణాలు తీయడంతో పాటు ఇద్దరు చిన్నారులను అనాథలుగా మార్చేసింది.