స్వలింగ సంపర్కానికి సహకరించట్లేదని మర్మాంగాన్ని కత్తిరించి.. పెళ్లి చేసుకోకూడదంటూ..

కర్ణాటకలోని మండ్య జిల్లా పాండవపుర తాలూకా పరిధిలోని సీతాపుర గ్రామంలో సునీల్ కుమార్ అలియాస్ సుని నివసిస్తున్నాడు. అదే జిల్లా కేఆర్ పేటెలోని ఓ కాలేజీలో చదువుకుంటున్న విద్యార్థితో అతడికి పరిచయం ఏర్పడింది. వీరిద్దరూ ప్రతి శుక్రవారం కలుసుకునేవాడు. ఈ నేపథ్యంలోనే ఫిబ్రవరి 14వ తేదీన బాధిత విద్యార్థి తీవ్ర రక్తస్రావంతో సీతాపుర రైల్వే గేట్ సమీపంలో స్థానికులకు కనిపించాడు. దీంతో అతడిని ఆస్పత్రికి తరలించారు.

స్థానికులు బాధిత విద్యార్థిని ఆస్పత్రిలో చేర్పించగా అక్కడ చికిత్స పొందుతూ కోలుకుంటున్నాడు. ఈ ఘటనపై శ్రీరంగపట్టణ పోలీసులు కేసు నమోదు చేశారు. అయితే పరువు పోతుందనే భయంతో బాధిత విద్యార్థి అసలు విషయాన్ని పోలీసులకు చెప్పేందుకు నిరాకరించాడు. కళాశాల నుంచి వస్తుండగా తనను ముగ్గురు వ్యక్తులు ఓ కారులో కిడ్నాప్ చేసి, అనంతరం తన మర్మాంగాన్ని కత్తిరించారని పోలీసులకు వివరించాడు. బాధితుడు చెప్పిన వివరాల ప్రకారం.. పోలీసులు దర్యాప్తు చేపట్టినప్పటికీ కిడ్నాప్ వ్యవహారం వెలుగులోకి రాలేదు.

బాధితుడు చెప్పిన విధంగా దర్యాప్తు చేపట్టగా.. కేసులో పురోగతి సాధించకపోవడంతో మరోసారి పోలీసులు బాధిత విద్యార్థిని విచారించారు. దీంతో బాధితుడు అసలు విషయాన్ని అంగీకరించాడు. సీతాపుర గ్రామానికి చెందిన సునీల్ కుమార్ అనే వ్యక్తితో చోటు చేసుకున్న ఘర్షణ సందర్భంగా అతను మర్మాంగాన్ని కత్తిరించినట్లు వెల్లడించాడు. తనతోనే ఉండాలని, భవిష్యత్తులో పెళ్లి కూడా చేసుకోకూడదంటూ సునీల్ కుమార్ తనను ఆదేశించాడని, ఈ విషయంలో ఇద్దరి మధ్య ఘర్షణ తలెత్తిందని చెప్పాడు. తనకు పెళ్లి జరగకూడదనే ఉద్దేశంతో మర్మాంగాన్ని కత్తిరించాడని తెలిపాడు.

దీంతో బాధిత విద్యార్థి తల్లిదండ్రుల ఫిర్యాదు మేరకు శ్రీరంగపట్టణ పోలీసులు కేసు నమోదు చేసి దర్యాప్తు చేపట్టారు. ఈ విషయం తెలిసిన వెంటనే సునీల్ కుమార్ పరారయ్యాడు. పోలీసుల నుంచి తప్పించుకోవడానికి బెంగళూరు, మైసూరు సహా పలు నగరాల్లో తలదాచుకున్నాడు. సెల్ ఫోన్ సిగ్నళ్ల ఆధారంగా నిందితుడిని పోలీసులు అరెస్టు చేసి, శ్రీరంగపట్టణానికి తీసుకొచ్చారు. నిందితుడిపై వివిధ సెక్షన్ల కింద కేసులు నమోదు చేసినట్లు ఎస్ఐ తెలిపారు.