ఛార్జింగ్ పెట్టి సెల్ ఫోన్‌లో మాట్లాడుతూ మహిళ దుర్మరణం

సెల్ ఫోన్ ఛార్జింగ్‌లో పెట్టి కాల్ మాట్లాడుతూ ఓ మహిళ దుర్మరణం పాలైంది. కరెంట్ షాక్‌కు గురవడం వల్లే ఈ విషాదం చోటుచేసుకుంది. కర్ణాటకలోని మాండ్య జిల్లాలో ఈ ఘటన జరిగింది. మాండ్య జిల్లా కబ్బరే గ్రామానికి చెందిన సౌభాగ్య (30) తన సెల్ ఫోన్ ఛార్జింగ్‌లో ఉండగా.. మరో వ్యక్తితో ఫోన్ మాట్లాడింది. ఆ తర్వాత అక్కడికక్కడే కుప్పకూలి మరణించింది.

గమనించిన కుటుంబ సభ్యులు బాధితురాలిని హుటాహుటిన ఆస్పత్రికి తరలించారు. అయితే.. ఆమె అప్పటికే మరణించినట్లు వైద్యులు తెలిపారు. సమాచారం అందుకున్న పోలీసులు ఘటనా స్థలికి వచ్చి పరిశీలించారు. కరెంట్ షాక్ వల్లే మహిళ మరణించినట్లు ప్రాథమికంగా గుర్తించారు..

షార్ట్ సర్క్యూట్ కారణంగానే ఈ ప్రమాదం జరిగినట్లు పోలీసులు భావిస్తున్నారు. కేసు నమోదు చేసుకొని దర్యాప్తు చేస్తున్నట్లు తెలిపారు. ఘటనకు సంబంధించిన పూర్తి వివరాలు తెలియాల్సి ఉంది. సెల్ ఫోన్‌ ఛార్జింగ్‌లో పెట్టి ఉండగా వాడకూడదని పదే పదే హెచ్చరిస్తున్నా పెడచెవిన పెడుతుండటంతోనే ఇలాంటి దారుణాలు చోటుచేసుకుంటున్నాయి.
Read this in Kannada