తెలంగాణలో ప్రేమజంట ఆత్మహత్య.. విషాదాంతమైన ఐదేళ్ల ప్రేమ

కాలేజీలో మొదలైన వారి పరిచయం ప్రేమగా మారింది. ఐదేళ్లుగా ప్రాణానికి ప్రాణంగా ప్రేమించుకుంటున్నారు. వీరి విషయం పెద్దలకు తెలియడంతో పెళ్లికి అంగీకరించారు. అయితే ఊహించని విధంగా ప్రియుడు రైలు కింద పడి ఆత్మహత్య చేసుకున్నాడు. అతడిని మరిచిపోలేక యువతి గోదావరిలో దూకి ప్రాణాలు తీసుకుంది. ఆలస్యంగా వెలుగులోకి వచ్చిన ఈ విషాద ఘటన మంచిర్యాల జిల్లా చెన్నూర్‌లో జరిగింది. శ్రీరాంపూర్‌కు చెందిన తగరం మణెమ్మ, స్వామి దంపతుల రెండో కూతురు మల్లికకు, రామకృష్ణాపూర్‌లోని అల్లూరి సీతారామరాజు నగర్‌కు చెందిన షేరు సంతోష్‌కు మంచిర్యాలలోని ఓ జూనియర్ కాలేజీలో ఇంటర్ చదువుతున్న సమయంలో పరిచయం ఏర్పడింది. అప్పటి నుంచి ఇద్దరూ ప్రేమించుకుంటున్నారు.

Also Read: ఆస్తి కోసం తల్లినే సజీవ దహనం చేసిన కొడుకు... నల్గొండ జిల్లాలో దారుణం

ఈ విషయం ఇటీవలే పెద్దలకు తెలియడంతో వారు పెళ్లికి ఓకే చెప్పారు. అయితే చదువు మధ్యలో మానేసిన సంతోష్ తరుచూ ఆన్‌లైన్ గేమ్స్‌ ఆడుతూ అప్పుల పాలయ్యాడు. ఈ క్రమంలోనే ఈ నెల 21న రైలు కింద పడి ఆత్మహత్య చేసుకున్నాడు. అప్పటి నుంచి మల్లిక తీవ్ర మనస్తాపానికి గురైంది. ప్రాంతం మారితే మనసు కాస్త కుదుటపడుతుందన్న ఉద్దేశంతో కుటుంబసభ్యులు ఆమెను పెద్దపల్లిలోని బంధువుల ఇంటికి పంపించాలనుకున్నారు.

Also Read: ఫేస్‌బుక్ పరిచయంతో దోపిడీ.. రూ.38లక్షలు పోగొట్టుకున్న హైదరాబాదీ మహిళ

ఈ నెల 25న ఆటోలో పెద్దపల్లి తీసుకెళ్తుండగా ఇందారం బ్రిడ్జి వద్ద ఆమె ఆటోలో నుంచి పారిపోయి గోదావరి నదిలోకి దూకేసింది. దీంతో కుటుంబసభ్యులు పోలీసులకు సమాచారం ఇచ్చారు. పోలీసులు గజ ఈతగాళ్ల సాయంతో గాలించగా ఈ నెల 26వ తేదీ రాత్రి నదిలో నుంచి మల్లిక మృతదేహం బయటపడింది. ప్రియుడు లేని లోకంలో తాను ఉండలేనన్న ఆవేదనతోనే మల్లిక ఆత్మహత్య చేసుకున్నట్లు పోలీసులు అనుమానిస్తున్నారు. దీనిపై కేసు నమోదు చేసి దర్యాప్తు చేపట్టారు.

Also Read: ప్రియురాలి కోసం దొంగగా మారి.. పనిచేస్తున్న సంస్థ నుంచే రూ.8లక్షల దోపిడీ