ముగ్గురు పిల్లలు పుట్టాక భార్య నల్లగా ఉందట! గుంటూరులో భర్త ఘాతుకం

కట్టుకున్న భార్యను వదిలించుకోవాలన్న ఉద్దేశంతో భర్త నిత్యం వేధింపులకు గురిచేసేవాడు. ముగ్గురు పిల్లలు పుట్టాక నల్లగా ఉన్నావంటూ సూటిపోటి మాటలతో హింసించడం మొదలుపెట్టాడు. చివరికి ఆమెను అంతమొందించేందుకు ప్రయత్నించడంతో దిక్కుతోచని స్థితిలో వివాహిత పోలీసులను ఆశ్రయించింది. తనకు భర్త నుంచి రక్షణ కల్పించాలని వేడుకుంది. ఈ దారుణ ఘటన గుంటూరులో వెలుగుచూసింది.

వట్టిచెరుకూరు మండలానికి చెందిన మహిళకు 2015లో వివాహమైంది. వారికి ముగ్గురు పిల్లలు సంతానం. కొద్దికాలం నుంచి భర్త తనకు విడాకులివ్వాలంటూ భార్యని వేధించడం మొదలుపెట్టాడు. నల్లగా ఉందని నిందిస్తూ కాపురం చేయనని సూటిపోటి మాటలతో హింసించేవాడు. అంతటితో ఆగని కసాయి భర్త విడాకులివ్వకుంటే చంపేస్తామంటూ కిరోసిన్ డబ్బాతో బెదిరించడంతో ఆమె భయపడి రోడ్డుపైకి పరుగులు పెట్టింది. భర్త వేధింపులు భరించలేక బాధితురాలు పోలీసులను ఆశ్రయించింది. అర్బన్ ఎస్పీని కలసి తన గోడు వెళ్లబోసుకుని కన్నీటిపర్యంతమైంది. స్పందించిన ఎస్పీ ఆమె సమస్యను పరిష్కరించాలని స్థానిక అధికారులను ఆదేశించారు.

Also Read: ఆ ఒక్కమాటే శాపం.! చెల్లెలిపై అత్యాచారం, నలుగురిని నరికి దారుణ హత్య