Hyd:బెయిల్‌పై బయటికొచ్చిన భర్త హత్య.. అమీర్‌పేటలో దారుణం

హైద‌రాబాద్‌లో వ్యక్తి దారుణ హత్యకు గురయ్యాడు. నగరంలోని అమీర్‌పేట్‌కు చెందిన వ్యక్తిని దుండగులు కిరాతకంగా అంతమొందించారు. స్థానిక ధరంకరం రోడ్డులోని ఓ అపార్టుమెంట్‌లో నివాసం ఉంటున్న చంద్రశేఖర్‌ను దుండగులు అతి దారుణంగా చంపేశారు. సాఫ్ట్ వేర్ ఇంజనీర్‌గా పనిచేస్తున్న చంద్రశేఖర్ భార్య ఆత్మహత్య చేసుకుని చనిపోయినట్లు తెలుస్తోంది. ఆ కేసులో జైలుకి వెళ్లిన చంద్రశేఖర్ ఇటీవల బెయిల్‌పై బయటికొచ్చినట్లు సమాచారం.

అందుకు ప్రతీకారంగానే ఈ హత్య జరిగి ఉంటుందని పోలీసులు అనుమానిస్తున్నారు. బయటి నుంచి వచ్చిన చంద్రశేఖర్ వాహనం పార్క్ చేసి వచ్చే సమయంలో నలుగురు దుండగులు కత్తులతో దాడి చేసి చంపేసినట్లు తెలుస్తోంది. సమాచారం అందుకున్న ఎస్సార్ నగర్ పోలీసులు సంఘటన స్థలానికి చేరుకున్నారు. మృతదేహాన్ని పరిశీలించి ఆధారాలు సేకరిస్తున్నారు. హత్యకు గల కారణాలపై ఆరా తీస్తున్నారు. మృతదేహాన్ని పోస్టుమార్టం కోసం ఆస్పత్రికి తరలించారు. ఎస్సార్ నగర్ పోలీసులు కేసు నమోదు చేసి దర్యాప్తు చేపట్టారు.

Also Read: నెల్లూరులో జంట హత్యల కలకలం.. అనుమానంతో భర్త ఘాతుకం!