పక్కింటి కుక్క ప్రాణాలు తీసింది.. భద్రాద్రి కొత్తగూడెంలో దారుణం

పెంపుడు కుక్క కోసం జరిగిన తగవు ఓ నిండు ప్రాణాన్ని బలిగొంది. తమ కుక్కకి పెట్టిన అన్నం పక్కింటి కుక్క తినడంతో ఇల్లాలికి కోపం వచ్చింది. పక్కింటి కుక్కని కొట్టింది. అది దాని యజమాని కంటపడింది. మా కుక్కనే కొడతావా అంటూ గొడవకు దిగాడు. భార్యతో కలసి వీరంగం వేశాడు. మహిళపై దాడి చేయడమేంటని ప్రశ్నించినందుకు ఆమె భర్తని కొట్టిచంపేశాడు. ఈ అత్యంత దారుణ ఘటన భద్రాద్రి కొత్తగూడెం జిల్లాలో చోటుచేసుకుంది.

జిల్లాలోని ములకలపల్లి మండలం తాళ్లపాయలో పక్కపక్క నివాసముంటున్న జోగులు(48), వీరాస్వామి కుక్కలను పెంచుకుంటున్నారు. జోగులు భార్య బజారమ్మ తమ కుక్క కోసం అన్నం పెట్టగా వీరాస్వామి పెంపుడు కుక్క తినేసింది. అది గమనించిన బజారమ్మ కుక్కని కొట్టింది. అది ఆ కుక్క యజమాని వీరాస్వామి కంటపడింది. తన భార్యతో కలసి ఆమె ఇంటిపైకి గొడవకెళ్లాడు. మాటామాటా పెరగడంతో ఆమెపై దాడి చేశారు.

సాయంత్రం ఇంటికొచ్చిన భర్త జోగులుకి భార్య గొడవ విషయం చెప్పింది. తనపై దాడి చేసి కొట్టారని చెప్పడంతో ఆగ్రహం చెందిన భర్త పక్కింట్లో ఉంటున్న వీరాస్వామిని నిలదీశాడు. ఇంట్లో ఎవరూ లేని సమయంలో దాడి చేయడమేంటని ప్రశ్నించాడు. అప్పటికే మద్యం మత్తులో ఉన్న వీరాస్వామి మరోమారు ఘర్షణకు దిగాడు.

Also Read: ఉద్యోగానికెళ్లని భర్త.. ఉరేసుకున్న దంపతులు.. కాకినాడలో విషాదం

గొడవ పెద్దది కావడంతో ఉన్మాదిగా మారి జోగులు తలపై కర్రతో బలంగా కొట్టాడు. దెబ్బ గట్టిగా తగలడంతో అతను అక్కడికక్కడే కుప్పకూలి మృతి చెందాడు. కుక్క కోసం జరిగిన గొడవ చివరికి జోగులు ప్రాణం తీయడంతో గ్రామంలో విషాదం నెలకొంది. సమాచారం అందుకున్న పోలీసులు కేసు నమోదు చేసి దర్యాప్తు చేపట్టారు. నిందితుడిని అరెస్టు చేశారు.

Read Also: పెనంమీద నుంచి పొయ్యిలోకి.. భర్త డ్రగ్ఎడిక్ట్.. ప్రియుడు తాగుబోతు.. చివరికి ఆమె..