ప్రేమ, పెళ్లి పేరుతో వేధింపులు.. యువకుడికి నిప్పంటించిన బాలిక

ప్రేమ, పెళ్లి పేరుతో వేధిస్తోన్న యువకుడికి పెద్ద షాక్ ఇచ్చిందో బాలిక. ప్రేమ పేరుతో వెంటపడుతూ.. తనను పెళ్లి చేసుకోకపోతే ఆత్మహత్య చేసుకుంటానని బెదిరించిన యువకుడికి బుద్ధి చెప్పాలనుకుంది. అతడు ఒంటిపై పెట్రోల్ పోసుకోగానే.. బాలికే అగ్గిపుల్లతో నిప్పంటించింది. బాధితుడి తల్లి ఫిర్యాదుతో.. ఉత్తరప్రదేశ్‌లో జరిగిన ఈ ఘటన ఆలస్యంగా బయటపడింది.

లక్నో సమీపంలోని ఖాద్రాకు చెందిన నిషాద్ అనే యువకుడు.. తన పొరిగింట్లో ఉండే బాలికను ప్రేమిస్తున్నాడు. ఆమె తొమ్మిదో తరగతి చదువుతోంది. తన ప్రేమ విషయాన్ని.. బాలిక కుటుంబ సభ్యులకు కూడా చెప్పాడు. ఆమె చదువుకుంటోందని.. పెళ్లి వయసు రాగానే వివాహం చేస్తామని హామీ ఇచ్చారు. అయినా నిషాద్ మాత్రం ఒప్పుకోలేదు.. పెళ్లి చేయాల్సిందేనని మారాం చేశాడట.

నిషాద్, పోలీసులు చెప్పిన వివరాల ప్రకారం.. ఆ బాలిక తన తల్లితో కలిసి అతడి ఇంటికి వచ్చిందట. తమ కూతురు పెద్దయ్యాక పెళ్లి చేస్తామని.. అది నచ్చక నిషాద్ ఒంటిపై పెట్రోల్ పోసుకున్నానడట. అతడ్ని ఆపాల్సింది పోయి.. ఆ బాలిక అగ్గిపుల్ల గీచి అతడిపై విసిరేసిందట. తర్వాత తల్లీకూతుళ్లు అక్కడి నుంచి పారిపోయారట.

బాధితుడ్ని స్థానికులు వెంటనే ఆస్పత్రికి తరలించారు. అతడి శరీరం 60శాతం గాయాలుకాగా.. ఆరోగ్య పరిస్థితి ఆందోళనకరంగానే ఉందంటున్నారు డాక్టర్లు. ముందస్తు జాగ్రత్తగా అతడి నుంచి వాంగ్మూలం తీసుకున్నారు. ఘటనపై కేసు నమోదు చేసి దర్యాప్తు చేస్తున్నారు. స్థానికులతో పాటూ ప్రత్యక్ష సాక్షుల్ని ప్రశ్నించారు.