భార్యాభర్తల గొడవలో దూరి.. హంతకుడిగా మారిన ఆటోడ్రైవర్.. కర్నూల్‌లో షాకింగ్

గొడవపడుతున్న భార్యాభర్తలను విడదీసేందుకు వెళ్లిన ఆటోడ్రైవర్ చిక్కుల్లో పడ్డాడు. వారిని విడదీసేందుకు ప్రయత్నించి బలంగా నెట్టేయడంతో భర్త కిందపడి మృతి చెందాడు. ఈ షాకింగ్ ఘటన కర్నూల్ జిల్లా నంద్యాలలో జరిగింది. నంద్యాల రూరల్ మండల పరిధిలోని నందమూరి నగర్‌కి చెందిన ఓబులేసు(50), రమాదేవి భార్యాభర్తలు. వారికి ఒక కొడుకు, కూతురు సంతానం. ఏదో విషయమై భార్యాభర్తల నడుమ వివాదం రేగింది.

అది చినికిచినికి గాలివానగా మారి తీవ్ర ఘర్షణ చోటుచేసుకుంది. భార్యాభర్తల గొడవను చూసి అదే వీధికి చెందిన ఆటో డ్రైవర్ బాషా స్పందించాడు. గొడవపడుతున్న ఆలుమగలను విడదీసేందుకు ప్రయత్నించాడు. ఈ క్రమంలో భర్త ఓబులేసును బలంగా నెట్టేశాడు. ఒక్క ఉదుటున కిందపడిపోయిన ఓబులేసు తల పగిలిపోయింది. తీవ్ర రక్తస్రావమై అతను అక్కడికక్కడే మృతి చెందాడు.

Also Read: కనిపించకుండా పోయిన అక్క.. గుట్టల్లో శవమై.. షాద్‌నగర్‌లో దారుణం

ఓబులేసు చనిపోయాడని గ్రహించిన బాషా వెంటనే అక్కడి నుంచి పరారయ్యాడు. సమాచారం అందుకున్న రూరల్ పోలీసులు అక్కడికి చేరుకుని సంఘటన స్థలాన్ని పరిశీలించారు. మృతదేహాన్ని పరిశీలించి పోస్టుమార్టం కోసం ప్రభుత్వాస్పత్రికి తరలించారు. మృతుడి భార్య ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. తగాదా పడుతున్న భార్యాభర్తలను విడదీయబోయి బాషా నేరస్తుడిగా మారాడు.

Read Also: బంధువులని బెడ్రూమ్ ఇస్తే నీచం.. గుంటూరులో షాకింగ్ ఘటన