భర్తే కాలయముడు... భార్యను మచ్చుకత్తితో నరికి చంపి

కట్టుకున్న భర్తే ఆమె పాలిట కాలయముడిగా మారాడు. కత్తితో భార్యను అతికిరాతకంగా చంపేసి పోలీసులకు లొంగిపోయాడు. నెల్లూరు నగరంలోని నాగేంద్ర నగర్‌లో ఆదివారం అర్ధరాత్రి ఈ ఘటన చోటుచేసుకుంది. చేజర్లకు పి.మాధవి(29)కి 12 సంవత్సరాల క్రితం మర్రిపాడుకు చెందిన నాగమణి అలియాజ్‌ మణితో వివాహమైంది. వీరికి కుమార్తె సంధ్య, కుమారుడు కార్తికేయ ఉన్నారు. మణి మూడేళ్లుగా నాగేంద్రనగర్‌‌లోని విజయభేరి అపార్టుమెంటులో వాచ్‌మెన్‌గా పనిచేస్తున్నాడు.

Also Read: మత ఘర్షణలు సృష్టించేందుకు యత్నం.. హైదరాబాద్‌లో ఇద్దరి అరెస్ట్

వివాహమైన కొంతకాలం నుంచే మణి తన భార్యపై అనుమానం పెంచుకుని వేధించేవాడు. దీంతో దంపతుల మధ్య నిత్యం గొడవలు జరుగుతుండేవి. భర్త వేధింపులపై ఆమె బుచ్చిలోని తన అక్క కృష్ణమ్మకు చెప్పగా.. ఆమె సర్దిచెప్పి మాధవిని తిరిగి కాపురానికి పంపించింది. ఈ నెల 29న అర్ధరాత్రి దంపతుల మధ్య మరోసారి వివాదం చెలరేగింది. ఆగ్రహం వ్యక్తం చేసిన మణి మచ్చు కత్తితో భార్యను అతి కిరాతకంగా హత్య చేశాడు. అనంతరం నవాబుపేట పోలీసుస్టేషన్‌లో లొంగిపోయాడు. నవాబుపేట ఇన్‌స్పె్క్టర్ వేమారెడ్డి, ఎస్సై రమేష్‌బాబు సంఘటన స్థలానికి చేరుకుని మృతదేహాన్ని పరిశీలించి ఆస్పత్రికి తరలించారు.

Also Read: ఆన్‌లైన్లో మద్యం కోసం ఫోన్ చేసిన దంపతులు.. అకౌంట్లో రూ.1.03లక్షలు ఖాళీ