Yadadri: ఆర్య సమాజ్‌లో పెళ్లి.. ఆర్నెల్లకే యువతి ఆత్మహత్య

ప్రేమించి పెళ్లి చేసుకున్న యువతి ఆర్నెళ్లకే ఆత్మహత్య చేసుకున్న విషాద ఘటన యాదాద్రి భువనగిరిలో వెలుగుచూసింది. అత్తింటి వేధింపులు భరించలేకే బలవన్మరణానికి పాల్పడిందని ఆమె బంధువులు ఆరోపిస్తున్నారు. ఈ ఘటన జిల్లాలోని మోత్కూర్ మండలం దాతప్పగూడెంలో జరిగింది. గ్రామానికి చెందిన నవిత(22) గత మార్చిలో ప్రేమ వివాహం చేసుకుంది. ఆర్యసమాజ్‌లో పెళ్లి చేసుకున్న జంట గ్రామంలో కాపురం పెట్టారు.

కొద్దికాలం సాఫీగానే సాగినప్పటికీ నవితకి అత్తింటి వేధింపులు మొదలయ్యాయి. వేధింపులు ఎక్కువవడంతో ఆమె ఈ నెల 2వ తేదీన పురుగుల మందు తాగి ఆత్మహత్యాయత్నం చేసింది. గమనించిన కుటుంబ సభ్యులు ఆమెను మెరుగైన వైద్యం కోసం హైదరాబాద్‌కి తరలించారు. అక్కడ చికిత్స పొందుతున్న నవిత గురువారం రాత్రి మృతి చెందింది. కూతురి మరణవార్త తెలుసుకున్న ఆమె కుటుంబ సభ్యులు తీవ్ర ఆరోపణలు గుప్పించారు. భర్త, అత్తమామల వేధింపుల కారణంగానే ఆమె ఆత్మహత్య చేసుకుందని ఆరోపించారు. పూర్తి వివరాలు తెలియాల్సి ఉంది.

Also Read: భర్తతో తాగుడు మాన్పించాలని తీసుకెళ్లి.. డాక్టర్‌తో భార్య ఎఫైర్.. చివరికి..