విజయవాడ: చెట్టుని ఢీకొట్టిన ఆటో.. ఇరుక్కుపోయి డ్రైవర్ నరకయాతన

కృష్ణా జిల్లాలో రోడ్డు ప్రమాదం చోటుచేసుకుంది. వేగంగా వెళ్తున్న ఆటో చెట్టుని ఢీకొట్టడంతో డ్రైవర్‌కి తీవ్రగాయాలయ్యాయి. విజయవాడ - హైదరాబాద్ రోడ్డులో కంచికచర్ల మండలం కీసర గ్రామ పరిధిలోని ఇన్వెంటా కెమికల్ వద్ద ఈ ప్రమాదం జరిగింది. టాటా ఏస్ ట్రక్కు ఆటో ప్రమాదవశాత్తూ అదుపుతప్పి రోడ్డు పక్కనున్న చెట్టును ఢీకొట్టింది.

ఈ ప్రమాదంలో ఆటో ముందుభాగం నుజ్జునుజ్జైంది. చెట్టుని బలంగా ఢీకొట్టడంతో ఖమ్మం జిల్లాకి చెందిన డ్రైవర్ శరత్ వాహనంలోనే చిక్కుకుపోయాడు. ఆటోలో ఇరుక్కుపోయి నరకయాతన అనుభవించాడు. వాహనదారులు 108కి సమాచారం అందించడంతో వైద్య సిబ్బంది సంఘటన స్థలానికి చేరుకుని సహాయక చర్యలు చేపట్టారు. అతికష్టమ్మీద డ్రైవర్‌ శరత్‌ని వాహనం నుంచి బయటకు తీసి నందిగామ ప్రభుత్వ వైద్యశాలకు తరలించారు. అయితే డ్రైవర్ ఆరోగ్య పరిస్థితి విషమంగా ఉన్నట్లు తెలుస్తోంది. పూర్తి వివరాలు తెలియాల్సి ఉంది.

Also Read: పెళ్లి కాకుండానే గర్భం.. ఆరా తీస్తే దారుణం వెలుగులోకి..