దైవదూషణ కేసులో ప్రొఫెసర్‌కు మరణ శిక్ష!

దైవ దూషణ కేసులో ఓ ప్రొఫెసర్‌కు మరణ శిక్ష విధిస్తూ శనివారం పాకిస్తాన్ కోర్టు తీర్పు వెలువరించింది. దైవాన్ని కించపరిచే వ్యాఖ్యలు చేశారనే ఆరోపణలకు మరణ శిక్ష ఖరారు చేసింది. 2013లో ప్రొఫెసర్‌ జునైద్‌ హఫీజ్‌ ఖాన్‌ ముల్తాన్‌లోని ఓ యూనివర్సిటీలో ప్రసంగించారు. అయితే ప్రసంగంలో దైవాన్ని దూషించేలా ఆయన వ్యాఖ్యలు చేశారంటూ కేసు దాఖలైంది. అప్పటి నుంచి ప్రొఫెసర్‌ను నిర్బంధంలోనే ఉంచి విచారించారు. ఈ నేపథ్యంలో పూర్తిస్థాయి విచారణ అనంతరం శనివారం ముల్తాన్ కోర్టు తీర్పు వెలువడింది. ప్రొఫెసర్‌కు మరణ శిక్షతో పాటు 5 లక్షల పాకిస్తాన్‌ రూపాయల జరిమానా విధించింది.

Also Read: నిర్లక్ష్యపు సమాధానం.. ఓలా బైక్ రైడర్‌కు జరిమానా!

ఈ తీర్పుపై ప్రొఫెసర్‌ తరపు న్యాయవాది మాట్లాడుతూ.. కక్షిదారుడికి చట్టాన్ని తప్పుగా అన్వయిస్తూ దోషిగా తేల్చారని, తీర్పును ఉన్నత న్యాయస్థానంలో సవాల్‌ చేస్తామని తెలిపారు. అయితే దైవ దూషణలో కేసుల్లో కఠిన శిక్షలు అమలు చేస్తూ ఇదివరకే పాకిస్తాన్ కోర్టులు అనేక తీర్పులు ఇచ్చాయి. ఈ చట్టాలను రద్దు చేయాలంటూ జాతీయ, అంతర్జాతీయ మానవహక్కుల సంస్థలు ఎప్పటి నుంచో డిమాండ్ చేస్తున్నాయి. ఇటీవలే ఐక్యరాజ్యసమితి వెలువరించిన నివేదికలో కూడా ఈ చట్టం, గిట్టని వారిపై ప్రయోగించే అస్త్రంగా దుర్వినియోగమవుతుందని వెల్లడించింది.

Also Read: గోవాలో గంజాయి అమ్మకం.. హైదరాబాద్‌లో డ్రగ్స్ వ్యాపారం!

ఇంతకు ముందు 2011లో ఆసియా బీబీ అనే క్రైస్తవ మహిళపై సైతం ఈ చట్టాన్ని ప్రయోగించారు. దీనిపై అంతర్జాతీయ మీడియా దృష్టి సారించడంతో 8 ఏళ్ల విచారణ అనంతరం ఆమెను ఈ ఏడాది జనవరిలో విడిచిపెట్టారు. అయితే విడుదల అనంతరం చంపేస్తామంటూ బెదిరింపులు రావడంతో మే నెలలో ఆమె కెనడా వెళ్లిపోయారు. అలాగే ఆసియా బీబీ వ్యాఖ్యలను సమర్థిస్తూ మాట్లాడినందుకు ఏకంగా పంజాబ్‌ గవర్నర్‌ను అతని బాడీగార్డే కాల్చి చంపాడు. పాకిస్తాన్‌లోని దైవ దూషణ చట్టం ప్రకారం అల్లా, ఇస్లాం, మత ప్రముఖులను కించపరుస్తూ ఎవరైనా మాట్లాడితే వారికి మరణశిక్ష విధిస్తారు.

Also Read: అత్తను రేప్ చేసిన అల్లుడు.. అవమానంతో ఆత్మహత్య