భారత సైనికులకు పాకిస్తాన్ అమ్మాయిల వలపు వల!

భారత సైనికులకు పాకిస్తాన్ అమ్మాయిలు వలపు వల (హనీ ట్రాప్) విసిరారు. దీని వెనుక పాకిస్తాన్ ఇంటర్ సర్వీసెస్ ఇంటలిజెన్స్ (ఐఎస్ఐ) హస్తం ఉందని కేంద్ర హోం శాఖ వెల్లడించింది. భారత భద్రతా రహస్యాలను తెలుసుకునేందుకు కేంద్ర భద్రతా బలగాలకు చెందిన జవాన్లపై ఫేస్‌బుక్‌తో పాటు ఇతర సోషల్ మీడియా మాధ్యమాల ద్వారా పాక్ అమ్మాయిలు వలపు వల విసిరారు. ఈ మేరకు నేషనల్ ఇన్వెస్టిగేషన్ ఏజెన్సీ (ఎన్ఐఏ) హోం మంత్రిత్వ శాఖకు నివేదించింది. ఇటీవల భారత నావికాదళంలో హనీ ట్రాప్‌లో చిక్కుకున్న విషయం తెలిసిందే.

Also Read: పాక్‌కు గూఢచర్యం.. ‘విశాఖ’లో ఏడుగురు నేవీ సిబ్బంది అరెస్ట్!

హనీ ట్రాప్ ద్వారా నేవీ సిబ్బంది నుంచి పాకిస్తాన్ కీలక సమాచారం పొందిందని ఇంటలిజెన్స్ దర్యాప్తులో తేలడంతో కేంద్ర హోంమంత్రిత్వ శాఖ అప్రమత్తమైంది. పాక్ ఐఎస్ఐ కుట్ర బయటపడటంతో కేంద్ర పారామిలటరీ దళాలకు చెందిన జవాన్లకు సోషల్ మీడియాతో పాటు స్మార్ట్ ఫోన్ల వినియోగంపై ఆంక్షలు విధించాలని కేంద్రం యోచిస్తోంది. ఇందులో భాగంగానే భారత నావికాదళంలో సిబ్బందికి నేవీ శిబిరాలు, ఓడల్లో ఇప్పటికే సోషల్ మీడియా, స్మార్ట్ ఫోన్లను వినియోగించకుండా నిషేధం విధించారు.

ఇప్పటికే ఏడుగురి అరెస్ట్..
ఆపరేషన్ డాల్ఫిన్ నోస్‌లో భాగంగా ఇటీవల ఏడుగురు నావికాదళ సిబ్బందిని పోలీసులు అరెస్టు చేసిన విషయం తెలిసిందే. విచారణలో విస్తుపోయే నిజాలు వెలుగులోకి వచ్చాయి. నావికాదళ సమాచారంతో పాటు హవాలా ద్వారా నగదు చేతులు మారినట్లు నిఘా వర్గాలకు కీలక ఆధారాలు లభించాయి.

Also Read: ‘అమిత్ షా అడగమన్నారు.. బీజేపీకి రూ. 3 కోట్ల ఫండ్ ఇవ్వండి’.. మంత్రికి ఝలక్!

అలాగే భవిష్యత్తులో అరెస్టుల సంఖ్య పెరిగే అవకాశం ఉందని నిఘా వర్గాలు చెబుతున్నాయి. అలాగే సోషల్ మీడియా వెబ్‌సైట్లపై ఇంటెలిజెన్స్ నిఘా పెంచేందుకు సిద్ధమవుతున్నారు. ఐఎస్ఐ హనీట్రాప్ ఉచ్చులో ఇంకా ఎవరెవరు పడ్డారన్న దానిపై ఆరా తీస్తున్నారు. ఇప్పటి వరకు అరెస్టు అయిన ఏడుగురి నుంచి మరింత మంది వివరాలు సేకరిస్తున్నారు. 2001 సంవత్సరంలోనూ గూడచర్యం కేసులో ఇద్దరు నేవీ ఉద్యోగులు సహా ముగ్గురిని విశాఖ పోలీసులు అరెస్టు చేశారు.

Also Read: పత్రికలో క్లాసిఫైడ్ చూసి ఫోన్ చేస్తే.. రూ. 25 లక్షలు ఊడ్చేశారు!