ఉసురు తీసిన అప్పులు.. పిల్లలకు విషమిచ్చి దంపతుల ఆత్మహత్య, పెళ్లిరోజే దారుణం

ఆర్థిక ఇబ్బందులు ఓ కుటుంబాన్ని నాశనం చేశాయి. అప్పుల బాధ తట్టుకోలేకపోయిన భార్యభర్తలు ఇద్దరు పిల్లలకు విషమిచ్చి చంపేసి అనంతరం ఒకే దూలానికి ఉరేసుకుని ఆత్మహత్య చేసుకున్నారు. ఈ విషాదకర ఘటన కర్ణాటకలోని బళ్లారి జిల్లా హొసపేటె తాలూకా గాదిగనూరులో బుధవారం ఉదయం వెలుగుచూసింది. గాదిగనూరులో నివాసం ఉండే నంజుండేశ్వర(32) సమీపంలోని జిందాల్‌ ఉక్కు కర్మాగారంలో పనిచేస్తున్నాడు.

Also Read: ప్రేమపెళ్లికి ఒప్పుకోని పేరెంట్స్.. మరొకరితో ప్రియుడు.. యువతి ఆత్మహత్య

వచ్చే జీతం కుటుంబ పోషణకు చాలకపోవడంతో దొరికిన చోటల్లా అప్పులు చేశాడు. అవి తీర్చే మార్గంక కనిపించక, రుణదాతలు ఒత్తిడి తట్టుకోలేక ఆత్మహత్యే శరణ్యనుకున్నాడు. మంగళవారం రాత్రి తన ఇద్దరు బిడ్డలు గౌతమి (3), స్వరూప్‌ (2)కు పురుగులమందు తాగించాడు. వారు చనిపోయారని నిర్ధారించుకున్నాక భార్య పార్వతి(27)తో కలిసి ఒకే దూలానికి ఉరేసుకుని ఆత్మహత్యకు పాల్పడ్డాడు.

బుధవారం ఉదయం వారిని గమనించిన స్థానికులు వెంటనే పోలీసులకు సమాచారం ఇచ్చారు. గాదిగనూరు పోలీసులు సంఘటనా స్థలాన్ని పరిశీలించి కేసు నమోదు చేసుకుని విచారణ చేపట్టారు. బుధవారం నంజుండ- పార్వతి ఐదో వివాహ వార్షికోత్సవం జరుపుకోవాల్సి ఉంది. ఈలోగానే వారు ఆత్మహత్య చేసుకున్నారన్న వార్త తెలిసి బంధువులు, సన్నిహితులు, గ్రామస్థులు విషాదంలో మునిగిపోయారు.