ఎదిగిన పిల్లలున్న తల్లికి గర్భం.. అవమానంతో ఆత్మహత్య.. అనంతపురంలో విషాదం

అనంతపురం జిల్లాలో విషాద ఘటన చోటుచేసుకుంది. ఆపరేషన్ విఫలమై గర్భం దాల్చడాన్ని అవమానంగా భావించిన మహిళ ఆత్మహత్య చేసుకుంది. ఈ ఘటన చెన్నేకొత్తపల్లి మండలం గొల్లవాండ్లపల్లిలో జరిగింది. గ్రామానికి చెందిన వెంకటేశ్, పార్వతమ్మ(36) భార్యాభర్తలు. వారికి ముగ్గురు కుమార్తెలు, ఒక కొడుకు సంతానం. అనంతరం పిల్లలు పుట్టకుండా ఆమె ట్యూబెక్టమీ ఆపరేషన్ కూడా చేయించుకుంది.

అయితే ఆపరేషన్ విఫలమై ఇటీవల ఆమె గర్భం దాల్చింది. శరీరంలో మార్పులతో అనుమానం వచ్చిన పార్వతమ్మ ఆస్పత్రికి వెళ్లి పరీక్షలు చేయించుకోవడంతో గర్భంతో ఉన్న విషయం తెలిసింది. ఆరు నెలల గర్భంతో ఉన్నట్లు వైద్యులు చెప్పడంతో ఆమె మనస్థాపానికి గురైంది. ఎదిగిన పిల్లలు ఇంట్లో ఉండగా తాను గర్భం దాల్చడాన్ని అవమానంగా భావించింది. ఇంట్లో విషపు గుళికలు తిని ఆత్మహత్యా యత్నం చేసింది. కుటుంబ సభ్యులు గమనించి ధర్మవరం ప్రభుత్వాస్పత్రికి తీసుకెళ్లారు. పరిస్థితి విషమించడంతో ఆమెను అనంతపురం ఆస్పత్రికి తరలించారు. అక్కడి చికిత్స పొందుతూ ఆమె ప్రాణాలు విడిచింది.

Also Read: హారన్ కొడితే హత్యలు.. సైకో బ్రదర్స్ కిరాతకం.. కాల్చిపారేసిన ఖాకీలుAlso Read: అడుక్కుని కోట్లకు పడగలెత్తిన అత్త.. అద్దె కోడలికి కన్నుకుట్టి..