కలచివేస్తున్న గర్భిణి మరణం.. లాక్‌డౌన్‌లో రక్తం దొరక్క..

రక్తం దొరక్క నిండు గర్భిణి ఆస్పత్రిలోనే మృతి చెందిన ఘటన తీవ్రంగా కలచివేస్తోంది. రక్తహీనతతో బాధపడుతున్న భార్యని ఆస్పత్రికి తీసుకెళ్లినప్పటికీ లాక్‌డౌన్ కారణంగా రక్తం సకాలంలో దొరకకపోవడంతో ఆస్పత్రిలోనే ప్రాణాలు విడిచింది. గర్భంతో ఉన్న భార్యని.. కడుపులో ఉన్న బిడ్డని కాపాడుకోవాలని ప్రయత్నించిన భర్త కళ్లెదుటే భార్య మరణించడంతో కుదేలైపోయాడు. తీవ్ర విషాదం నింపిన ఈ ఘటన అనంతపురంలో వెలుగుచూసింది.

సకాలంలో రక్తం అందక ఓ గర్భిణి ప్రాణాలు కోల్పోయింది. అనంతపురం జిల్లాలోని తాడిపత్రికి చెందిన నారాయణస్వామి, పద్మావతి(23) భార్యాభర్తలు. పద్మావతి నిండు గర్భిణి. ఆమె పరిస్థితి విషమంగా ఉండడంతో భర్త నారాయణ స్వామి ఆమెను అనంతపురం జిల్లా ఆస్పత్రికి తీసుకెళ్లాడు. రక్తహీనతతో బాధపడుతున్న పద్మావతికి రక్తం ఎక్కించాలని వైద్యులు చెప్పారు. అయితే బ్లడ్‌ బ్యాంకులో రక్తం నిల్వలు లేకపోవడంతో పరిస్థితి విషమించింది.

Also Read: కడసారి తండ్రిని చూసుకోలేక మనస్థాపంతో కొడుకు.. అనంతపురంలో విషాదం

రక్తం కోసం ఎంత ప్రయత్నించినా దొరకలేదు. ప్రయత్నాలు జరుగుతుండగానే ఆమె పరిస్థితి విషమంగా మారింది. సరైన సమయంలో రక్తం దొరక్కపోవడంతో అక్కడే ప్రాణాలు విడిచింది. కడుపులో బిడ్డతో సహా కన్నుమూసింది. భార్య కళ్లెదుటే చనిపోతున్నా ఏమీ చేయలేక నిస్సహాయతతో భర్త భోరుమని విలపించాడు. లాక్‌డౌన్ కారణంగా రక్తం దొరక్క ప్రాణాలు కోల్పోయిన ఘటన ప్రతి ఒక్కరినీ తీవ్రంగా కలచివేస్తోంది. వైద్య సదుపాయాలు, సిబ్బంది అందరూ అందుబాటులోనే ఉన్నా రక్తం నిల్వలు లేక గర్భిణి ప్రాణాలు కోల్పోవాల్సి వచ్చింది.

ఈ విషాద ఘటన తెలుసుకుని చలించిపోయిన అనంతపురంలోని ఓ యువజన సంఘం వెంటనే స్పందించింది. గర్భిణి ప్రాణాలు కాపాడలేకపోయినా మరెవరికీ ఇలాంటి పరిస్థితి రాకూడదని ఆస్పత్రికి చేరుకుని రక్తదానం చేశారు. బ్లడ్ బ్యాంకులో నిల్వ ఉంచి ఆపదలో ఉన్నవారికి అందించాలని కోరారు. ఆస్పత్రి సిబ్బంది యువకులను అభినందించారు.

Read Also: కామపిశాచిగా మారిన కన్నతండ్రి.. కూతురిపై నెల రోజులుగా దారుణం