తల్లీకూతుళ్లని ట్రాక్టర్‌తో తొక్కించి.. రేప్ కేసు నిందితుడి కిరాతకం

రేప్ కేసులో జైలుకెళ్లి బెయిల్‌పై బయటికొచ్చిన నిందితుడు తల్లీకూతుళ్లను దారుణంగా హత్య చేసిన అమానుష ఘటన యూపీలో చోటుచేసుకుంది. కస్గంజ్ జిల్లా అమన్‌పూర్‌కి చెందిన యశ్‌వీర్ అదే ప్రాంతానికి చెందిన బాలికపై అత్యాచారం చేశాడు. బాలికకు 13 ఏళ్ల వయసులో 2016లో దారుణానికి ఒడిగట్టాడు. ఈ ఘటనపై అప్పట్లో అరెస్టైన యశ్‌వీర్.. ఏడాది అనంతరం 2017 అక్టోబర్‌లో బెయిల్‌పై బయటికొచ్చాడు.

అప్పటి నుంచి తనపై కేసు పెట్టిన బాధితురాలి కుటుంబంపై పగ పెంచుకున్నాడు. అప్పటికే ఇరు కుటుంబాల మధ్య పాత గొడవలు కూడా ఉండడంతో కోపంతో రగిలిపోయాడు. బాధితురాలి కుటుంబాన్ని అంతమొందించాలని నిర్ణయించుకుని అదను కోసం ఎదురుచూశాడు. బాధితురాలు, ఆమె తల్లి సైకిల్‌పై ఇంటికి రావడం గమనించిన దుర్మార్గుడు.. ట్రాక్టర్‌తో తొక్కించేశాడు.

సైకిల్‌ని అమాంతం ఢీకొట్టడంతో తల్లీ కూతుళ్లు కిందపడిపోయారు. యశ్‌వీర్ ట్రాక్టర్‌ని వారిపై నుంచి పోనిచ్చి కిరాతకంగా చంపేశాడు. స్థానికులు అప్రమత్తమవడంతో అక్కడి నుంచి పరారయ్యేందుకు ప్రయత్నించాడు. ట్రాక్టర్ కింద సైకిల్ ఇరుక్కుపోవడంతో అక్కడే వదిలేసి పారిపోయాడు. సమాచారం అందుకున్న పోలీసులు సంఘటన స్థలానికి చేరుకుని మృతదేహాలను పరిశీలించారు. కేసు నమోదు చేసి దర్యాప్తు చేపట్టారు.

Also Read: గుంటూరులో కీచకపర్వం.. అమ్మాయిల ఫొటోలు మార్ఫింగ్ చేసి.. దారుణం

యశ్‌వీర్ కుటుంబానికి, బాధితురాలి కుటుంబానికి మధ్య పాత గొడవలున్నట్లు కస్గంజ్ ఎస్పీ సుశీల్ గులే తెలిపారు. డబ్బు వివాదంలో యశ్‌వీర్ తండ్రి మహావీర్‌ని బాధితురాలి తండ్రి హత్య చేసినట్లు కేసు నమోదైందని ఆయన చెప్పారు. ఆ కేసులో జైలుకెళ్లిన బాధితురాలి తండ్రి 2018లో బెయిల్‌పై బయటికొచ్చాడని తెలిపారు. బాలికపై అత్యాచారం కేసులో యశ్‌వీర్ జైలుకెళ్లొచ్చినట్లు పేర్కొన్నారు. ఇరుకుటుంబాలపై మూడు కేసులు నమోదైనట్లు తెలిపారు. యశ్‌వీర్ మర్డర్ కేసు నమోదు చేసినట్లు ఎస్పీ చెప్పారు.

Read Also: రెచ్చగొట్టిన గర్ల్‌ఫ్రెండ్.. బట్టలిప్పేసిన బాయ్‌ఫ్రెండ్.. చివరికి..