భూ రిజిస్ట్రేషన్ ఆలస్యం చేసినందుకే తహసీల్దార్ హత్య!

తెలంగాణలోని రంగారెడ్డి జిల్లా అబ్దుల్లాపూర్‌మెట్ తహసీల్దార్ విజయారెడ్డి దారుణహత్యపై పోలీసులు దర్యాప్తు చేపట్టారు. సోమవారం మధ్యాహ్నం సమయంలో సురేశ్ అనే వ్యక్తి ఎమ్మార్వోపై పెట్రోల్ పోసి నిప్పటించడంతో ఆమె అక్కడికక్కడే సజీవదహనమయ్యారు. ఆమెను కాపాడేందుకు ప్రయత్నించిన ఇద్దరు వ్యక్తులకు తీవ్రగాయాలయ్యాయి.

Also Read: తెలంగాణలో మహిళా ఎమ్మార్వో సజీవ దహనం

హయత్‌నగర్ మండలం గౌరెల్లి గ్రామానికి చెందిన సురేశ్‌కు అదే గ్రాామంలో పొలం ఉంది. దాని రిజిస్ట్రేషన్ నిమిత్తం మాట్లాడేందుకు సోమవారం మధ్యాహ్నం 1.30 గంటల సమయంలో ఎమ్మార్వో ఆఫీసుకు వచ్చి ఆమె ఛాంబర్‌లోకి వెళ్లాడు. కాసేపట్లో లంచ్‌ బ్రేక్ తీసుకోనున్న విజయారెడ్డి సురేశ్‌ను లోనికి పిలిచి మాట్లాడారు. సుమారు అరగంటసేపు ఎమ్మార్వోతో మాట్లాడిన సురేశ్ ఆమెతో వాగ్వాదానికి దిగాడు. తలుపు లోపల గడియపెట్టి వెంట తెచ్చుకున్న పెట్రోల్ ఆమెపై పోసి నిప్పు పెట్టాడు. మంటలు తనకు కూడా అంటుకోవడంతో తలుపు తీసుకుని బయటకు పరుగులు పెట్టాడు. ఎమ్మార్వో కేకలు విన్న ఉద్యోగులు ఏం జరిగిందని సురేశ్‌ను అడగ్గా షార్ట్ సర్క్యూట్ జరిగిందని చెబుతూ పరుగు పెట్టాడు.

Also Read: మహిళా ఎమ్మార్వో సజీవదహనం ఘటనపై ప్రభుత్వం సీరియస్

తర్వాత కొద్ది సెకన్లలోనే మంటల్లో కాలిపోతూ విజయారెడ్డి బయటకు వచ్చారు. ఆమెను రక్షించేందుకు కారు డ్రైవర్, మరో వ్యక్తి ప్రయత్నించినా ఫలితం లేకపోయింది. తీవ్రంగా కాలిపోవడంతో ఎమ్మార్వో అందరూ చూస్తుండగానే ప్రాణాలు కోల్పోయారు. మరోవైపు నిందితుడు సురేశ్ కాస్త దూరం పరుగెత్తుకుంటూ వెళ్లి పడిపోయాడు. సంఘటనా స్థలానికి చేరుకున్న పోలీసులు నిందితుడిని అరెస్ట్ చేసి ఆస్పత్రికి తరలించారు. ఎమ్మార్వో తన భూ రిజిస్ట్రేషన్ ఆలస్యం చేస్తుండటం వల్లే సురేశ్ ఈ ఘాతుకానికి పాల్పడినట్లు తెలుస్తోంది. నిందితుడిని సమగ్రంగా విచారించిన తర్వాతే పూర్తి వివరాలు తెలియజేస్తామని పోలీసులు చెబుతున్నారు. రాచకొండ పోలీస్ కమిషనర్ మహేశ్ భగవత్ సంఘటనా స్థలాన్ని పరిశీలించి వివరాలు సేకరించారు.

Also Read: అన్నాచెల్లెల మధ్య ప్రేమ.. పెళ్లికి పెద్దలు నో చెప్పడంతో