చెరువులో దిగి ఇద్దరు బాలురు మృతి.. హైదరాబాద్‌లో విషాదం

హైదరాబాద్‌లో విషాద ఘటన చోటుచేసుకుంది. సరదాగా చెరువులో దిగి ఇద్దరు బాలురు మృత్యువాతపడ్డారు. ఈ ఘటన చాంద్రాయణగుట్ట పోలీస్ స్టేషన్ పరిధిలోని ఉందా సాగర్ చెరువలో చోటుచేసుకుంది. బండ్లగూడ నూరినగర్ ప్రాంతానికి చెందిన సయ్యద్ రహీం(13), షేక్ సొహైల్(14) స్థానిక పాఠశాలలో 8వ తరగతి చదువుతున్నారు. కరోనా లాక్‌డౌన్ కారణంగా ఇంటి వద్దే ఉంటున్న ఇద్దరు బాలురు అదే ప్రాంతానికి చెందిన స్నేహితులు సైఫ్ (13), సమీర్ (14) , ఫైజ్ (16), రిహాన్ (13), గౌస్ (16), ఇమ్రాన్ (15)తో కలసి ఉందా సాగర్ చెరువు వద్దకు వెళ్లారు.

చెరువులో కొందరు యువకులు ఈతకొడుతూ కనిపించడంతో రహీం, సొహైల్ కూడా సరదాగా చెరువులో దిగారు. ఇద్దరికీ ఈత రాకపోవడంతో చెరువులో మునిగిపోయారు. వారి కోసం స్నేహితులు, ఈత కొడుతున్న యువకులు గాలించినా ప్రయోజనం లేకపోయింది. వెంటనే గల్లంతైన ఇద్దరి కుటుంబ సభ్యులకు విషయం తెలియజేయడంతో వారు చాంద్రాయణగుట్ట పోలీసులకు సమాచారమిచ్చారు. సంఘటన స్థలానికి చేరుకున్న కుటుంబ సభ్యులు, పోలీసులు గాలింపు చర్యలు చేపట్టారు.

Also Read: విశాఖలో గ్యాంగ్‌ వార్ కలకలం.. కత్తులు దూసుకున్న రౌడీషీటర్లు.. ఆరుగురి అరెస్ట్!

స్థానిక యువకులు, పోలీసులు చెరువులో దిగి గాలించి రహీంను బయటకు తీశారు. కాళ్లూ చేతులూ రుద్ది బాలుడు స్పృహ‌లోకి వచ్చేందుకు ప్రయత్నించారు. కొద్దిగా కదలిక కనిపించడంతో వెంటనే ఆస్పత్రికి తరలించారు. అయితే అప్పటికే అతను చనిపోయినట్లు వైద్యులు నిర్ధారించారు. గల్లంతైన సొహైల్ కోసం గాలింపు చర్యలు కొనసాగుతున్నాయి. చాంద్రాయణగుట్ట ఇన్స్పెక్టర్ రుద్రభాస్కర్ , అడ్మిన్ ఎస్సై జకీర్ హుస్సేన్ , ఎస్సై వేంకటేష్, స్థానిక నాయకుడు ఖాదర్ గాలింపు చర్యలను పర్యవేక్షించారు.

Read Also: కామంతో బరితెగించిన ఆంటీ.. యువకుడితో శృంగారలీలలు.. చివరికి..