కళ్లలో కారం కొట్టి.. కత్తులతో పొడిచి.. హైదరాబాద్‌లో దారుణం

కిరాణా షాపు యజమాని కళ్లలో కారంకొట్టి కత్తులతో పొడిచేసిన దారుణ ఘటన హైదరాబాద్‌లో జరిగింది. హయత్‌నగర్‌కి చెందిన అంజన్ రెడ్డి స్థానికంగా కిరాణా దుకాణం నిర్వహిస్తున్నాడు. గుర్తుతెలియని దుండగులు అంజన్‌పై హత్యాయత్నం చేశారు. దుకాణంలో చొరబడిన దుండగులు అంజన్ కళ్లలో కారం కొట్టి.. కత్తులతో విచక్షణా రహితంగా పొడిచేశారు. చేతులు, మెడపై కత్తిగాట్లున్నాయి. గొంతుకోసి పరారైనట్లు తెలుస్తోంది. తీవ్రగాయాలపాలైన బాధితుడు రక్తపు మడుగులో కుప్పకూలిపోయాడు.

ఫోన్ చేసినా తీయకపోవడంతో అనుమానం వచ్చిన కుటుంబ సభ్యులు ఊరి నుంచి ఇంటికి వచ్చేశారు. ఇంటికి తాళం వేసి ఉండడంతో దుకాణం వద్దకు వెళ్లినట్లు తెలుస్తోంది. దుకాణానికి తాళం వేయకపోవడంతో షట్టర్ తీసి రక్తపు మడుగులో పడి ఉన్న అంజన్‌ని చూసి షాక్‌కి గురయ్యారు. క్షతగాత్రుడిని తక్షణం సమీపంలోని ఆస్పత్రికి తరలించి చికిత్స అందిస్తున్నారు. ప్రస్తుతం ఆయన పరిస్థితి విషమంగా ఉన్నట్లు తెలుస్తోంది. అతనిపై ఎవరు? ఎందుకు హత్యాయత్నం చేశారో తెలియాల్సి ఉంది.

Also Read: నర్సింగ్ విద్యార్థిని ఆత్మహత్య.. సికింద్రాబాద్‌లో విషాద ఘటన