కటింగ్ నచ్చలేదు.. 16వ అంతస్తు నుంచి దూకిన 13 ఏళ్ల బాలుడు

హెయిర్ కటింగ్ బాగాలేదని కలత చెంది 8వ తరగతి చదువుతున్న ఓ విద్యార్థి బలవన్మరణానికి పాల్పడ్డాడు. 16వ అంతస్తులో తాము నివాసం ఉంటున్న ఫ్లాట్‌లో బాత్రూమ్ విండో నుంచి కిందకు దూకి ప్రాణాలు విడిచాడు. కుటుంబసభ్యులందరూ నిద్రపోయిన తర్వాత రాత్రి 11.30 గంటల సమయంలో ఆత్మహత్యకు పాల్పడ్డాడు. హృదయవిదారకమైన ఈ ఘటన మహారాష్ట్రలోని ముంబై సబర్మన్ ప్రాంతం భయందర్‌లో మంగళవారం (ఏప్రిల్ 4) రాత్రి చోటుచేసుకుంది. పోలీసులు తెలిపిన వివరాల ప్రకారం..శత్రుఘ్న పాఠక్ (13 ఏళ్లు) అనే బాలుడు ముంబై సమీపంలోని భయందర్ పట్టణంలో ‘న్యూ గోల్డెన్ నెస్ట్‌’లోని సోనమ్ ఇంద్రప్రస్త్ భవనంలో తన తల్లిదండ్రులతో కలిసి నివాసం ఉంటున్నాడు. స్థానికంగా ఓ పాఠశాలలో 8వ తరగతి చదువుతున్నాడు. వరుసకు అన్న అయ్యే ఓ వ్యక్తితో కలిసి మంగళవారం మధ్యాహ్నం అతడు హెయిర్‌కట్ చేయించుకోవడానికి వెళ్లాడు. ఇంటికి తిరిగొచ్చాక అద్దంలో చూసుకొని తనకు కటింగ్ సరిగా చేయలేదని కలత చెందాడు. చాలా చిన్నగా చేశారని మనస్తాపానికి గురయ్యాడు.

శత్రఘ్నకు అతడి తల్లి, ఇద్దరు అక్కలు నచ్చజెప్పారు. కానీ, అతడు మనస్తాపంతో కుమిలిపోయాడు. రాత్రి 11.30 గంటల సమయంలో కుటుంబ సభ్యులందరూ నిద్రపోయిన తర్వాత అతడు బాత్రూమ్‌లోకి వెళ్లి కిటికీలో నుంచి కిందకు దూకాడు. తీవ్ర గాయాలతో రక్తపుమడుగులో పడిఉన్న బాలుడిని గుర్తించి అపార్ట్‌మెంట్ వాసులు వారి తల్లిదండ్రులకు సమాచారం ఇచ్చారు. బాలుడిని హుటాహుటిన ఆస్పత్రికి తరలించగా.. అప్పటికే అతడు మృతి చెందాడని వైద్యులు ధ్రువీకరించారు.

పోలీసులు ‘ప్రమాదవశాత్తు మృతి’గా కేసు నమోదు చేశారు. దర్యాప్తు కొనసాగిస్తున్నట్లు వెల్లడించారు.