మాయమాటలు చెప్పి, గదిలోకి రప్పించి.. విశాఖ యువతిపై అత్యాచార యత్నం

మాయమాటలు చెప్పి ఓ వ్యక్తి.. యువతిపై అత్యాచార యత్నం చేసిన ఘటన విశాఖపట్నంలో ఆలస్యంగా వెలుగులోకి వచ్చింది. నగరంలోని ఓ గదికి రప్పించి తనపై అఘాయిత్యానికి ప్రయత్నించాడని బాధితురాలు ఆరోపించింది. ఈ మేరకు పోలీసులకు ఫిర్యాదు చేసింది. బాధితురాలు ఫిర్యాదులో పేర్కొన్న వివరాల ప్రకారం.. గాజువాకకు చెందిన అవినాశ్‌ అనే వ్యక్తి గురువారం (ఏప్రిల్ 16) ఆమెపై అత్యాచారయత్నం చేశాడు.

స్థానికంగా తాను ఓ సెల్‌ఫోన్‌ కంపెనీలో పనిచేస్తున్నట్లు బాధితురాలు తెలిపింది. ఎక్కువ నెట్‌వర్క్‌ కనెక్షన్లు తీసుకుంటానని నమ్మించి.. అవినాశ్ తనను ఉషోదయ కూడలిలోని ఓ ఇంటికి రప్పించాడని చెప్పింది. అక్కడ ఓ గదిలోకి తీసుకెళ్లి అత్యాచారం చేసేందుకు ప్రయత్నించాడని తెలిపింది. ఆ హఠాత్పరిణామానికి ఆందోళనకు గురై అక్కడి నుంచి తప్పించుకొని వచ్చినట్లు చెప్పింది. ఘటన జరిగిన సమయంలో ఇంట్లో ఎవరూ లేరని తెలిపింది.

తనపై అఘాయిత్యం చేయబోయిన కామాంధుడి నుంచి తప్పించుకునే క్రమంలో గాయాల పాలైనట్లు బాధితురాలు వివరించింది. ఆమె ఫిర్యాదు మేరకు పోలీసులు కేసు నమోదు చేసుకొని దర్యాప్తు ప్రారంభించారు. ఏసీపీ వైవీ నాయుడు ఆదేశాల మేరకు సీఐ సన్యాసినాయుడు విచారణ చేపట్టారు.