Mumbai 23వ అంతస్తు నుంచి దూకి ప్రముఖ రియల్ ఎస్టేట్ వ్యాపారి ఆత్మహత్య

దేశ ఆర్థిక రాజధాని ముంబయి నగరంలో (Mumbai Builder) ప్రముఖ రియల్ ఎస్టేట్ వ్యాపారి పరాస్ పోర్‌వాల్ (Paras porwal) ఆత్మహత్యకు పాల్పడటం కలకలం రేపుతోంది. ఆయన 23వ అంతస్తులోని తన హోమ్ జిమ్ (Home Gym) పై నుంచి గురువారం దూకి ఆత్మహత్య (Suicide)కు పాల్పడ్డారు. చించ్‌పోకి రైల్వే స్టేషన్ సమీపంలోని శాంతి కమల్ హౌసింగ్ సొసైటీ భవనంలో నివాసం ఉండే పరాస్ పోర్‌వాల్.. జిమ్ బాల్కనీ నుంచి ఉదయం 6 గంటల ప్రాంతంలో కిందకు దూకినట్టు పోలీసులు వెల్లడించారు. పారస్ రాసిన ఓ సూసైడ్ నోట్‌ను జిమ్‌లో పోలీసులు గుర్తించారు. తన మరణానికి ఎవరూ కారణం కాదని, ఎవరిపైనా దర్యాప్తు చేయవద్దని ఆ నోట్‌లో పరాస్ పేర్కొన్నట్టు పోలీసులు తెలిపారు.

భవంతి పైనుంచి పరాస్ దూకుతుండటాన్ని అటుగా వెళ్తోన్న ఓ వ్యక్తి గమనించి... వెంటనే కుటుంబసభ్యులు, స్థానిక పోలీసులకు సమాచారం ఇచ్చారు. అయితే, అప్పటికే జరగాల్సిన నష్టం జరిగిపోయింది. అక్కడకు చేరుకున్న పోలీసులు మృతదేహాన్ని స్వాధీనం చేసుకుని ఫోరెన్సిక్ పరీక్షలకు పంపారు. కేసు నమోదుచేసిన పోలీసులు.. ఆత్యహత్యకు పాల్పడడానికి గల కారణాలపై ఆరా తీస్తున్నారు. ఆర్థికంగా నష్టపోవడం వంటి వ్యక్తిగత కారణాలతో ఆయన ఆత్మహత్యకు పాల్పడి ఉండొచ్చని అనుమానం వ్యక్తం చేస్తున్నారు. దర్యాప్తులో అన్ని విషయాలు వెల్లడవుతాయని పోలీసులు పేర్కొన్నారు.